Atyraýda shetel azamaty 9-qabattan sekirip mert boldy

Atyraý qalasynda shetel azamaty turǵyn úıdiń 9-qabatynan sekirip ketken. Onyń mundaı áreketke barý sebebi ázirge belgisiz, dep habarlaıdy Kazinform. 

Oblystyq polıtsııa departamentiniń baspasóz qyzmetinen málim etkendeı, oqıǵa keshe, 10 qańtarda bolǵan.

«Atyraý qalasynyń «Nursaıa» shaǵyn aýdanyndaǵy turǵyn úı keshenderiniń birinde keshki saǵat 19:26 shamasynda er adamnyń 9-qabattan sekirip ketkeni týraly habar tústi. Er adam oqıǵa ornynda kóz jumdy. Oqıǵa ornyna jetken qalalyq polıtsııa basqarmasynyń qyzmetkerleri sýıtsıd jasaǵan Ózbekstan Respýblıkasynyń azamaty ekenin anyqtady. Marqum 1964 jyly týǵan», -dep habarlady departamenttiń baspasóz qyzmeti.t

Qazir derekke baılanysty QR Qylmystyq kodeksiniń 105-babynyń 1-bóligimen qylmystyq is tirkeldi. Osyǵan baılanysty tıisti is qujattary jınaqtalyp jatyr.

Polıtsııa qyzmetkerleri sheteldik turǵyn úıdiń joǵarǵy qabatynan sekirýine ne sebep bolǵanyn naqtylaǵan joq.

Eske sala ketelik, buǵan deıin Atyraý oblysynda jol apatynan jedel járdem qyzmetkeri mert bolǵanyn jazǵan edik.