Atyraýda saýda jelileri azyq-túlik baǵasyn shekti deńgeıden kóterip jibergen
ATYRAÝ. KAZINFORM – Atyraýda saýda jelileri tótenshe jaǵdaı kezinde baǵany shekti deńgeıden kóterip jibergen. Saýda qyzmetine qatysty zań talabyn buzǵandarǵa salynǵan aıyppul kólemi – 2 mln 817 myń teńge.
Atyraý oblystyq saýda jáne tutynýshylardyń quqyǵyn qorǵaý departamenti basshysynyń orynbasary Erkebulan Taǵashevtyń málimetinshe, bıylǵy 6 aıda «Saýda qyzmetin retteý týraly» zań talaptaryn buzǵan 51 kásipkerlik sýbektige jospardan tys tekserý júrgizilgen.
«Tekserýdiń qorytyndysymen 46 kásipkerlik sýbektige shara qoldanyldy. Atap aıtqanda, 16 eskertý, 30 ákimshilik aıyppul salyndy. Aıyppuldyń jalpy somasy 2 mln 817 myń 691 teńgeni qurady», -deıdi Erkebulan Taǵashev.
Onyń aıtýynsha, mamyr aıynda Atyraý oblysynyń ákimdigi óńirde áleýmettik mańyzy bar azyq-túlik taýarlaryna ruqsat etilgen shekti bólshek saýda baǵalarynyń mólsheri bekitilgen. Osyǵan oraı monıtorıngtik top apta saıyn áleýmettik mańyzy bar azyq-túlik taýarlarynyń baǵasyn qadaǵalaǵan. Sondaı-aq, óńirdegi saýda nysandarynyń ıelerine baǵany turaqtandyrý jóninde túsindirilgen.
«Tutynýshylardyń aryzyna sáıkes Atyraý qalasyndaǵy «Anvar», «Marko», «ıArmarka», «Masha Frýt», Qulsary qalasyndaǵy «Ideal» sýpermarketine jáne «Іlııasova G.B.» jeke kásipkerligine QR Ákimshilik quqyq buzýshylyq týraly kodekstiń 202-babyna sáıkes shara qoldanyldy. Óıtkeni, olar tótenshe jaǵdaı kezinde belgilengen taýarlardy shekti baǵadan asyryp satqan», - dep habarlady Erkebulan Taǵashev.
Sondaı-aq, departamentke jyl basynan beri tutynýshylardan 424 aryz túsken. Onyń ishinde 230 aryz qanaǵattandyrylǵan. Al, 82 aryz ıesine sotqa shaǵymdaný jóninde jazbasha túsinik berilgen. Sonymen birge, 84 aryz tıisti memlekettik organdarǵa qaıta joldanǵan. Qazir 20 aryz qaralyp jatyr, 8 tutynýshy aryzyn keri qaıtaryp alǵan.
«Tutynýshylar aryzyn qaraý kezinde jospardan tys 12 tekserý júrgizildi. Sonyń nátıjesinde kásipkerlik sýbektilerine 10 eskertý berildi. Departament tarapynan berilgen nusqaýdy oryndamaǵany úshin Atyraý qalalyq mamandandyrylǵan sotynyń qaýlysymen «Mechta Market» JShS-ǵa 1 mln 300 myń teńge kóleminde aıyppul salyndy», -dep málim etti Erkebulan Taǵashev.
Eske sala ketelik, buǵan deıin Atyraýda sońǵy 3 jylda áleýmettik mańyzy bar azyq-túlik qory 3,5 esege ulǵaıǵanyn jazǵan edik.
