Atyraýda saýda-oıyn saýyq ortalyǵyndaǵy órt oqshaýlandy
ATYRAÝ. KAZINFORM – Atyraý qalasyndaǵy «Baızar» saýda-oıyn saýyq ortalyǵynyń ǵımaraty órtendi. Jergilikti qutqarýshylar jalyndy oqshaýlaǵanymen, sóndirý jumysy áli jalǵasyp jatyr.
Atyraý oblystyq tótenshe jaǵdaılar departamentiniń qoǵammen baılanys tobynan habarlaǵandaı, saýda ortalyǵyndaǵy órt saǵat 21:53-te oqshaýlanǵan.
«Atyraý qalasynda ornalasqan «Baızar» oıyn-saýyq ortalyǵyndaǵy órt oqıǵasyna baılanysty tótenshe jaǵdaılar departamentiniń daǵdarys ortalyǵynda qaýyrt jeli iske qosyldy. Turǵyndarǵa 45-14-75 nómeri arqyly aqparattyq qoldaý kórsetý jáne shuǵyl psıhologııalyq kómek kórsetiledi», -dep habarlady departamenttiń qoǵammen baılanys toby.
Saýda-oıyn saýyq ortalyǵyndaǵy órt týraly búgin, 27 qazanda saǵat 18:37 shamasynda shaqyrtý túsken.
«Departamenttiń órt sóndirýshileri Atyraý qalasyndaǵy saýda-oıyn saýyq keshenindegi órtke baılanysty oqıǵa ornyna jedel jetti. Qazir saýda ortalyǵynyń ǵımaratynan 80 adamdy, onyń ishinde 45 balany qaýipsiz jerge evakýatsııalady. Oqıǵa ornynda shtab qurylyp, órtti sóndirý jumystary júrgizilip jatyr», -dep málim etti departamenttiń qoǵammen baılanys tobynan.
Órtten eshkim zardap shekpegen. Jalyn sóndirýge Atyraý oblystyq tótenshe jaǵdaılar deparatmentinen 90 qutqarýshy, 12 tehnıka tartylǵan.
Eske sala ketelik, budan buryn atyraýlyq qutqarýshylar shatyry órtengen úıden 82 jastaǵy ájeni arqalap shyǵarǵanyn habarlaǵan bolatynbyz.
