Atyraýda «Saraishyq Upgrade-2025» halyqaralyq jastar forýmy ótti
ATYRAÝ. KAZINFORM – Atyraýda 300-den astam jastyń basyn qosqan halyqaralyq jastar forýmy aıaqtaldy.
Bıyl bul alańǵa elimizdiń barlyq óńiriniń jáne Reseı, Qyrǵyzstan, Ázirbaıjan men Ózbekstan memleketiniń jastary jınaldy.
Eki kúndik forýmnyń jabylý saltanatyna oblys ákiminiń orynbasary Daryn Shamuratov qatysyp, jastardyń talpynysyna joǵary baǵa berip, aldaǵy bastamalaryna sáttilik tiledi. Sondaı-aq ol forýmnyń sátti ótýine kásibı turǵyda úles qosqan spıkerlerge aımaq basshysynyń Alǵys hatyn tabystady.
Forým baǵdarlamasynda paneldik pikirtalastar, sektsııalyq kezdesýler men sheberlik sabaqtary qamtylyp, jastar ártúrli baǵyt boıynsha kásibı spıkerlerden dáris aldy. Atap aıtsaq, jasandy ıntellekt, marketıng, mýzyka, kınemotografııa jáne teatr men horeografııa baǵyttary qamtylyp, jastarǵa jańa bilim men daǵdylardy meńgerip, óz qabiletterin shyńdaýǵa múmkindik berildi.
Qorytyndy keshte osy baǵyttar boıynsha ótken baıqaý jeńimpazdary marapattalyp, úzdik tanylǵan 6 jas 500 000 teńgeden qarjylaı syıaqyǵa ıe boldy. Olar: horeografııa baǵyty boıynsha Baǵyt Bısembaı, marketıng — Ánýarbek Maǵzomov, mýzyka — Mahambet Ábilov, kınematografııa — Nurpeıis Adılov, jasandy ıntellekt — Erkebulan Balǵabekov jáne teatr baǵytynda Qýanyshbek Aısaǵalı.
Sonymen qatar, forýmnyń alǵashqy kúni óńirdiń tarıhı-mádenı murasyn keńinen nasıhattaý maqsatynda spıkerler men qatysýshylar tarıhı Saraıshyq qalashyǵyna ekskýrsııa jasady.
Osy jyly forýmǵa qatysý úshin jastardan 997 ótinim tústi. Bul jastardyń qyzyǵýshylyǵyn jáne damý men bilimge degen talpynysynyń dáleli.
Búginde «Saraishyq Upgrade» forýmy — halyqaralyq deńgeıde tájirıbe almasyp, elder arasyndaǵy yntymaqtastyqty damytýdyń erekshe alańyna aınaldy. Halyqaralyq deńgeıde uıymdastyrylǵan forým Atyraýdyń tarıhı-mádenı áleýetin tanytyp qana qoımaı, jastardyń ózara tájirıbe almasýyna, jańa bastamalaryn júzege asyrýyna jáne jahandyq damý úrdisterine belsendi qatysýyna múmkindik berip otyr.
Forýmdy Atyraý oblysy Іshki saıasat basqarmasynyń qoldaýymen, «Jastar tańdaýy — Atyraý» qoǵamdyq birlestigi uıymdastyrdy. Maqsaty — kreatıvti ındýstrııany damytýǵa jáne halyqaralyq yntymaqtastyqty nyǵaıtýǵa baǵyttalǵan halyqaralyq jastar alańyn qurý.
Aıta keteıik, «Saraishyq Upgrade» halyqaralyq jastar forýmy Atyraý qalasynda alǵash ret 2017 jyly ótkizildi. Bıyl forým tórtinshi ret ótti.