Atyraýda polıtsııa kapıtanynyń bas bostandyǵy 4 jylǵa shekteldi
Atyraýda polıtsııa kapıtany alaıaqtyq jáne laýazymdy adamǵa para berýge aıdap salý kúdigine ilingen. Sot kúdiktini birneshe bappen aıypty dep tanyp, bas bostandyǵyn 4 jylǵa shektedi, dep habarlaıdy Kazinform.
Atyraý qalasynyń №2 sotynda jedel bolyp jumys istegen poıtsııa kapıtany A.A.-ǵa qatysty qylmystyq is qaraldy. Kúdiktige QR Qylmystyq kodeksiniń 190-babynyń 3-bóliginiń 2) tarmaǵy, 28-babynyń 4-bóligi, 367-babynyń 2-bóligimen, 361-babynyń 2-1-bóligimen aıyp taǵylǵan.
«A.A. quqyq qorǵaý organynyń qyzmetkeri bola tura, 2021-2023 jyldar aralyǵynda laýazymdyq ókilettigin ózine paıda jáne artyqshylyq alý maqsatynda, qyzmet múddelerine qaıshy paıdalanyp, azamatshalar N.B. jáne L.A.-dan árkez aqsha qarajatyn qaryz esebinde alyp, olardyń quqyqtary men zańdy múddelerine eleýli zııan keltirgen. Budan basqa, 2021 jylǵy 7 jeltoqsanda A.A. zańsyz esirtki zatyn satýmen aınalysqan azamatsha N.N.-ǵa qylmystyq jaýaptylyqtan bosatýǵa kómektesýge ýáde berip, ony aldap, laýazymdy tulǵaǵa para berýge aıdap salǵan. Sottalýshynyń kinási kýálardiń aıǵaqtarymen, aqsha aýdarymdary týraly túbirtektermen jáne basqa is qujattarymen dálelin tapty», - dep habarlady sottyń baspasóz qyzmeti.
Sot tergeýi kezinde A.A.-nyń 2021 jylǵy 6 jeltoqsanda QR Qylmystyq kodeksiniń 361-babynyń 2-1-bóligimen kúdikti retinde ustalǵan ıA.I.-ge qatysty jeke tintý tergeý áreketin júrgizip, sońǵysynan alynǵan uıaly telefon men ámııanyn ıemdengeni dáleldenbegen.
«Sottalýshy A.A. QR Qylmystyq kodeksiniń 190-baby 3-bóliginiń 2-tarmaǵymen, 28-baby 4-bóligi – 367-baby 2-bóligimen, 361-baby 2-1 babymen kináli dep tanyldy. Oǵan belgili bir laýazymdardy atqarý quqyǵynan ómir boıyna aıyrýmen, 58-baptyń 3-bóliginiń negizinde 4 jyl merzimge bas bostandyǵyn shekteý túrindegi jaza taǵaıyndaldy. Polıtsııa kapıtany sheninen aıyryldy», - dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraýda jas bosanǵan áıeldiń qazasyna qatysy bar dárigerlerge sot úkimi shyqqanyn jazǵan edik.
