Atyraýda oqýshylardyń esirtkige táýeldiligi tekseriledi
ATYRAÝ. KAZINFORM – Atyraýda alǵash ret oqýshylardyń esirtkige táýeldiligi tekseriledi. Qazirgi ýaqytta oblystyq bilim berý basqarmasy 63 myńǵa jýyq oqýshy men stýdenttiń ata-analarynan jazbasha kelisim alý jumysymen aınalysyp jatyr.
Basty maqsat – esirtkige elitkenderdi erte satydan anyqtaý jáne aldyn alý. Ázirge testileýdiń qaı ýaqytta bastalary belgisiz. Narkoskrınıngti Atyraý oblystyq psıhıkalyq densaýlyq ortalyǵy oblystyq bilim berý basqarmasymen birlese júzege asyrady. Oǵan 9-11 synyp oqýshylary men kolledjderdiń 1 kýrs stýdentteri ata-analarynyń kelisimimen qatystyrylady.
– Atyraý oblysynda 2024-2027 jyldarǵa arnalǵan qylmyspen kúresý jáne onyń aldyn alý, zańdylyq pen quqyqtyq tártipti nyǵaıtý boıynsha vedomstvoaralyq keshendi josparynyń 23 tarmaǵy boıynsha esirtkige táýeldilikti erte satylarynda anyqtaý maqsatynda jáne esirtki tutynýshylardyń durys esebin qalyptastyrý boıynsha QR Densaýlyq saqtaý mınıstriniń 2024 jylǵy 11 jeltoqsandaǵy №104 buıryǵyna sáıkes «konsýltatıvtik baqylaý» júzege asyrylýda, - dedi basqarmanyń baspasóz hatshysy Lázzat Ótepova.
Oblystyq psıhıkalyq densaýlyq ortalyǵy naroskrınıngke daıyndyqty bastap ketti. Mamandar ata-analarǵa alańdaýǵa negiz joq dep otyr. Tekserý barysynda oqýshy tek zárin tapsyrady. Al ony jınaý jáne taldaý jumystary ortalyq qyzmetkerlerine júktelgen.
– Ata-analar óz urpaǵynyń densaýlyǵyna asa mán berip qaraý kerek. Biz olar suraǵan barlyq aqparatty aıtamyz. Tekseris júrgizý úshin ata-analardyń kelisimi kerek. Jastardyń aǵzasynda qandaı esirtki bar ekenin anyqtaý. Onyń eshqandaıda qıyndyǵy joq. Anyqtaý úshin jassóspirimniń zárinen 11 túrli esirtkiniń bar-joǵyn anyqtaımyz, - dedi Atyraý oblystyq psıhıkalyq densaýlyq ortalyǵynyń psıhıatr-narkology Temir Esengeldın.
Jýyqta Memleket basshysy Qarjylyq monıtorıng agenttiginde ótken jıynda esirtki bıznesimen kúresti kúsheıtý qajettigin aıtqan edi.