Atyraýda oqshaýlaý mekemesiniń qyzmetkerlerine kúsh kórsetýge oqtalǵandar sottaldy

ATYRAÝ. KAZINFORM – Atyraýda tórt jigit qylmystyq-atqarý júıesine qarasty oqshaýlaý mekemesiniń qyzmetkerlerine kúsh kórsetý qaterin tóndirgen. Sot aıyptalýshylardyń 3-eýin 8 jylǵa, 1-eýin 6,8 jylǵa bas bostandyǵynan aıyrdy.

Atyraý qalalyq №2 sotta aıyptalýshylarǵa qatysty QR Qylmystyq kodeksiniń 429-babynyń 3-bóligimen jáne 429-babynyń 3-bóligimen qozǵalǵan qylmystyq isti qarady.

- Sottalýshylar T., K., Ý., I. Atyraý qalasyndaǵy №75 mekemede kúzetpen ustalyp otyrǵan ózderiniń tanystarynyń múddesin qoldap, olarǵa qatysty qoǵamnan oqshaýlaýdy qamtamasyz etetin mekemeniń qyzmetkerlerimen qoldanylyp júrgen rejımdik sharalaryn toqtatý maqsatyn kózdegen. Olar aldyn ala sóz baılasyp, 2024 jylǵy 18-23 aqpan aralyǵynda ózderi ortaq paıdalanatyn áleýmettik chatta atalǵan mekeme qyzmetkerleri Q. men R.-ǵa qatysty kúsh qoldaný qaterin tóndirýdi uıymdastyrý týraly habarlamalar jazǵan. Sonyń ishinde sottalýshy I. sottalýshylardy oqshaýlaý mekemesiniń qyzmetkerlerine kúsh qoldaný qaterin tóndirý áreketin jasaýǵa azǵyrǵan. Sonyń nátıjesinde 2024 jylǵy 23 aqpanda saǵat túngi 23.00 shamasynda sottalýshylar T., K., Ý. №75 mekemesiniń kúzet jáne rejım bóliminiń bastyǵy Q.-nnyń januıa múshelerimen turyp jatqan meken-jaıyna kólikpen baryp, jábirlenýshi Q.-ǵa syrtqa shyǵýdy buıyrǵan, - dep habarlady sottan.

Sol ýaqytta jábirlenýshi Q.-nyń shaqyrýymen №75 mekemesiniń kúzet jáne rejım bólimi bastyǵynyń orynbasary R. oqıǵa ornyna kelgen.

- Ekeýine sottalýshylar T., K., Ý. №75 mekemede ustalyp otyrǵan tanystaryna qatysty rejımdik is-sharalardy toqtatý týraly zańsyz talaptaryn qoıǵan. Jábirlenýshilerge psıhologııalyq qysymshylyq jasap, kúsh qoldaný qaterin tóndirgen, -dep málim etti vedomostvodan.

Prokýror sottalýshylar T., K., Ý.-ǵa 8 jyl 6 aı, I.-ge QR Qylmystyq kodeksiniń 55-babynyń 2-bóliginiń 2) tarmaǵyn qoldanyp, 6 jyl 8 aı merzimge bas bostandyǵynan aıyrý jazasyn taǵaıyndaýdy surady. Jábirlenýshiler prokýrordyń pozıtsııasymen kelisti.

Biraq, sottalýshylar ózderiniń áreketi qylmys ekenin bilmegenderin aıtyp, bas bostandyqtarynan aıyrmaýdy surady. Qorǵaýshylar sottalýshylardyń áreketin durys saralaýdy nemese aqtaýdy, qylmystyq isti toqtatýdy usyndy.

Sotpen jaza taǵaıyndaý barysynda sottalýshylar T., K., Ý.-diń qylmystyq jaýaptylyǵy pen jazasyn jeńildetetin jáne aýyrlatatyn mán-jaılar anyqtalmady. Al, sottalýshy I.-diń jas balalarynyń barýy onyń jazasyn jeńildetetin mán-jaı retinde qaraldy. Aýyrlatatyn mán-jaılar anyqtalmady.

- Sottalýshylar T., K., Ý. QR Qylmystyq kodeksiniń 429-babynyń 3-bóligimen kináli dep tanyldy. Olardyń árqaısysyna 8 jyl merzimge bas bostandyǵynan aıyrý jazasy taǵaıyndaldy. Al, sottalýshy I. Qylmystyq kodeksiniń 28-babynyń 4-bóligi, 429-babynyń 3-bóligimen kináli dep tanyldy. Onyń jazasyn jeńildetetin mán-jaıdyń anyqtalǵany, aýyrlatatyn mán-jaıdyń bolmaýy eskerilip, Qylmystyq kodeksiniń 55-babynyń 2-bóliginiń 2) tarmaǵy qoldanyldy. Oǵan 6 jyl 8 aı merzimge bas bostandyǵynan aıyrý túrindegi jaza berildi, - dedi sottan.

Sot úkimi zańdy kúshine engen joq.

Eske sala ketelik, budan buryn qyzǵanyshtan áıel men 2 balany órtep jibergen atyraýlyq ómir boıyna sottalǵanyn jazǵan edik.