Atyraýda NCOC menedjerin óltirgen qaskóıdiń úkimi ózgerissiz qaldy

ATYRAÝ. KAZINFORM – Atyraýda munaı kompanııasynyń menedjerin qatygezdikpen óltirgen qaskóıdiń úkimi ózgerissiz qaldy. Búgin Atyraý oblystyq sotynyń qylmystyq ister jónindegi sot alqasynda ómir boıyna sottalǵan Arman Jetpisov pen onyń advokatynyń apellıatsııalyq shaǵymdary qaraldy. 

Sot alqasy úkimdi ózgertýge nemese onyń kúshin joıýǵa negiz joq dep tapty.

– Jábirlenýshiniń paıdasyna materıaldyq jáne moraldyq zalal óndirildi. Sot alqasymen sot úkimin ózgertýge nemese onyń kúshin joıýǵa negizder anyqtalmady. Osyǵan baılanysty birinshi sotynyń úkimi ózgerissiz, apellıatsııalyq shaǵymdar qanaǵattandyrýsyz qaldyryldy, - dep málimdedi Atyraý oblystyq sotynyń baspasóz qyzmeti. 

Byltyr sáýir aıynda Atyraý qalasyndaǵy elıtalyq turǵyn úı kesheninde áıeldiń múrdesi tabylyp, keıin qylmystyq is qozǵaǵanyn habarlaǵan edik.

Keıin kúdikti ustalyp, onyń 38 jastaǵy qala turǵyny Arman Jetpisov ekeni belgili boldy.

Byltyr kúzde iske núkte qoıylyp, Atyraý oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshy alaıaqtyq, zorlaý jáne júkti áıeldi basqa qylmystardy jasyrý maqsatynda asa qatygezdikpen óltirgeni, sondaı-aq urlyq jasaǵany jáne avtokólikti zańsyz ıemdengeni úshin kináli dep tanyldy.