Atyraýda kolledj stýdentteri jańa qurylǵy men qosymsha oılap tapty
ATYRAÝ. KAZINFORM – Atyraýda S.Muqashev atyndaǵy joǵary polıtehnıkalyq kolledjiniń jańashyl stýdentteri ónertapqyshtyǵymen tanyldy.
Máselen, 3-kýrs stýdenti Nurdáýlet Kenjebaı aýany tazartýǵa qoldanatyn qurylǵyny oılap tapqan.
– Syrtqy kórinisin jasandy ıntellekt arqyly beıneledim. Al súzgisine belsendirilgen kómirdi paıdalanamyn. Bul qurylǵyny zerthanalaryndaǵy sorǵy shkaftarda qoldanýǵa bolady. Óıtkeni, hımııalyq zertteý júrgizý kezinde qurylǵy ýly gazdyń 60 paıyzyn tutyp qalady, - deıdi ónertapqysh stýdent.
Ol munaı jáne gazdy qaıta óńdeý tehnologııasy boıynsha bilim alyp júr. Óziniń qurylǵysyna zertteý kezinde belsendirilgen kómirdiń ýly gazdy jaqsy sińiretinin anyqtaǵan.
– Kómirdi mataǵa salyp óńdedik. Bul ıdeıany zertteýge 2-3 apta, al súzgisin daıyndaýǵa úsh aı jumsadym. Bolashaqta zertteýimdi jalǵastyrǵym keledi, -de»di Nurdáýlet Kenjebaı.
Al esepteý tehnıkasy jáne aqparattyq jeliler mamandyǵynda bilim alyp júrgen Shadııar Jandarbek, Nurıslam Ótepbergen, Damır Qadyrǵalı men Artýr Ómirǵalı jańa qosymshany jasap shyǵarǵan. «NeXa» atalatyn jańa qosymshaǵa 5 baǵytty qamtyǵan test tapsyrmalary júktelgen. Qosymsha – beıimdelgen kýrs bazasy bar bilim berý platformasy. Bul qosymsha arqyly bilim alýshylar óz deńgeıin tekserýine bolady. Ázirge test tapsyrmalary orys tilinde júkteldi. Aldaǵy ýaqytta qazaq jáne aǵylshyn tilindegi nusqasy qosylady. Test tapsyrmalarynyń baǵyty kóbeıedi, - deıdi avtordyń biri Shadııar Jandarbek.
Ol byltyrǵy jeltoqsanda «Táýelsizdik urpaqtary» jobasynda «Aqparattyq tehnologııa» baǵyty boıynsha jeńimpaz atanǵan.
Eske sala ketelik, budan buryn Kolledjderdiń 100 úzdik stýdenti marapattalǵany jazylǵan bolatyn.