Atyraýda kıikter aýyl ishinde jaıylyp júr
ATYRAÝ.KAZINFORM — Kıikter Atyraýdaǵy aýyldardyń ishinde emin-erkin jaıylyp júr. Inspektorlar bolsa jaǵdaıdy paıdalanyp, kıip atýǵa bolmaıtynyn eskertip jatyr.
Kıikterdiń kóbeıgenin oblys turǵyndary bir apta buryn baıqaǵan. Sońǵy 3-4 kún ishinde Qurmanǵazy aýdanyna qarasty aýyldardyń ishinde júrgenin kózben kórip, áleýmettik jelilerge júktegen.
Mundaı kórinis Isataı, Mahambet, Inder aýdandarynan da baıqalady.
Mamandardyń sózinshe, kıikterdiń óńirge kelýine kórshiles Batys Qazaqstan oblysynda jaýǵan qalyń qar sebep. Aqbókender azyq izdep, Kaspıı teńizine qaraı baǵyt alǵan. Al sońǵy aptada oblys aýmaǵynan shamamen bir mıllıonǵa jýyq kıik ótipti.
Degenmen aýmaqtyq ınspektsııa mamandary jaǵdaıdy paıdalanyp, kıik atýǵa bolmaıtynyn aıtty. Óıtkeni aýlaý maýsymy tek kúzde bastalady. Zańdy buzǵan azamattarǵa jaýapkershilik qarastyrylǵan.
— Olardyń azyǵy — teńizdiń qamysy. Úı janýarlary ótpeý úshin kerilgen torlar mıgratsııanyń jolyna kedergi keltirip tur. Sondyqtan olar qandaıda bir baǵyt izdep aýyldyq jerlerge kirgen. Qazirgi ýaqytta kıik atatyn kez, merzim emes. Qatań tyıym salynǵan. Sanyn retteýge jatatyn janýar bolǵandyqtan qyrkúıek-qarasha aılarynda ǵana aýlaýǵa bolady. Búginde kıikti aýlaýǵa, ustaýǵa bolmaıtynyn eskertemin. Qylmystyq kodeksiniń 339-baby boıynsha qylmystyq jaýapkershilik kózdelgen, — dedi Atyraý oblystyq orman sharýashylyǵy jáne janýarlar dúnıesi aýmaqtyq ınspektsııanyń bas mamany Mereke Shalqarov.
Qurmanǵazy aýdanynda jeltoqsan aıynyń ortasynan beri 2 myńǵa jýyq iri qara ınfektsııalyq rınotraheıt vırýstyq dıareıa juqpaly aýrýǵa shaldyqqan. Veterınarlar 4 aýyldyq okrýgke maldyń kirip-shyǵýyna jáne soıylýyna shekteý qoıǵan. Aýrýdyń bul túri túlik arasynda jıi kezdesedi, kıikterge esh qatysy joq deıdi aýdandyq aýmaqtyq ınspektsııa mamandary.
— 390 qoradan 1945 bas aýyryp turǵany anyqtaldy. Onyń 892-si emdelip, jazyldy. Aýrýdyń bul túri aýdanymyzda júrgen kıiktermen baılanystyryp jatyr. Bul aqparat shyndyqqa janaspaıdy, — dedi Qurmanǵazy aýdandyq aýmaqtyq ınspektsııasy basshysynyń mindetin atqarýshy Saıasat Jánibekov.
Osyǵan deıin Qazaqstan kıik múıizin eksporttaıtynyn jazǵan edik.
Buǵan qosa Úkimet kıik sanyn retteý jáne múıizderin tańbalaý máselesin qarap jatqanyn habarladyq.