Atyraýda kıik et kombınatynda soıylyp, eti bazarda satylady
ATYRAÝ. KAZINFORM — Atyraýda Alaman jáne Eski bazarda kıik eti satylyp jatyr. Munda kıik terisi sypyrylyp, jýylyp, keıin ǵana bazarǵa shyǵarylady.
Kıik eti Atyraýǵa qyrkúıek aıynan bastap jetkizildi. Eki tasymaldaýshynyń biri Batys Qazaqstannan daıyn kúıinde ákelse, endi biri jumysty «Ohotzooprom ÓB» RMQK-nyń ınspektorlarymen birge atqaryp jatyr. Kásipker men ınspektorlar birigip, tasymaldaýdy uıymdastyrdy.
— Eski bazarda kıik eti senbi-jeksenbi kúnderi satylady. Inspektsııa mamandary monıtorıng jasaýǵa baryp, qujattaryn tekserdi. Qujattary túgel, veterınar mamandardyń qorytyndysy, ruqsat qaǵazy bar. Sonymen birge Atyraýda «Batys KZ 25» JShS-i de «Ohotzooprom ÓB» RMQK-men kelisimshartqa otyryp, kıik etin qabyldap jatyr. Inspektorlar tasymaldaýdy uıymdastyrady. Et «Alaman» bazarynda satylady, — dedi Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy bóliminiń basshysy Elmıra Qurmanǵalıeva.
«Ohotzooprom ÓB» RMQK-nyń ınspektorlary Batys Qazaqstan terrıtorııasynda kıikti atyp, ishek-qarnyn alyp, keıin Atyraýǵa ákeledi. Atyraýdaǵy et kombınatynda terisin sypyryp, jýyp, qylshyǵyn úıitip, bazarǵa shyǵarady.
— Bul birinshi ret emes. 2023 jyly dál osylaı boldy. Bári «Ohotzooprom ÓB» RMQK men JShS arasynda kelisim aıasynda atqarylyp jatqan jumys, — dedi «Ohotzooprom ÓB» RMQK-nyń Atyraýdaǵy ókili.
Atyraý qalasynda kıik etiniń kelisi 1800 jáne 2000 teńge. Eki bazardaǵy baǵa eki túrli. «Alaman» bazarynda kıik ushasynyń kelisi 1800 teńge jáne bul baǵa qarasha aıyna deıin sol kúıi qalady.
— Et kombınaty Atyraý qalasynan 5 shaqyrym qashyqtyqtaǵy Bereke aýylynda ornalasqan. Osy jerde kıikti soıyp, tazalap, tońazytqyshqa salamyz. «Ohotzooprom ÓB» RMQK-nyń ınspektorlary ólshep, múıizin kesip alyp, tirkeý jumysyn júrgizedi. Et kombınatynan olarǵa arnaıy bólme berildi. Eki ınspektor jumysyn 30 qarashaǵa deıin jalǵastyrady. Veterınar mamandar anyqtamasyn bergen soń «Alaman» bazaryna jetkizip jatyrmyz. Baǵasy — 1800 teńge. Satý jumystarynyń bastalǵanyna eki aptadan asty. Ótimi jaqsy. Alǵashqy kezde kúnine 100 ushasyn ótkizgen edik. Qazir aıdyń aıaǵy, adamdardyń aqshasy azaıǵan shaq. Kúnine 10-15 ushasyn ǵana satyp jatyrmyz. Jan-jaqqa habarlandyrý berip, jarnama da jasaldy. Adamdar bir-birinen de estip, keledi, — dedi «Batys KZ 25» JShS-niń basshysy Serik Qapar.
Onyń aıtýynsha, bir tasymaldaǵanda Batys Qazaqstannan 9 tonnasyn ákeledi. Kıikti soıyp, taza salmaǵyn ólshegende 6 tonna et shyǵady.
— Kıiktiń laǵy 6-8 keli, eshkisi 15-16 keli, teke 25 keli tartady. Salmaǵy ártúrli. Baǵasyn sol kúıi saqtap qalamyz. Kelisi — 1800 teńge, — dedi Serik Qapar.
Aıta keteıik, Aqtóbede kıik etine suranys joǵary. Munda kıik ushasy Oraldan jetkizilip jatyr. Qazirgi kezde et úsh bazarda satylymǵa shyqty.