Atyraýda qatarlastaryn baltamen qýalaǵan oqýshy sabaqqa baryp júr

ATYRAÝ. KAZINFORM – Atyraý oblysy Qulsary qalasynda qatarlastaryn baltamen qýalaǵan oqýshyǵa qatysty alǵashqy sot otyrysy ótti. Sottyń sheshimimen bala úıqamaqqa qamaldy. Bul týraly oblystyq bilim berý basqarmasynyń basshysy Marat Ábýov aıtty.

Onyń sózinshe, oqýshynyń kámelet jasqa tolmaýyna, óńirdegi krımınaldyq ahýalǵa jáne jasóspirimniń ata-anasynyń suraýy boıynsha 15 jastaǵy jasóspirim úıqamaqqa jiberilgen. Oqýshyǵa tek mektep pen medıtsınalyq uıymdarǵa barýyna ruqsat etildi. Mundaı shekteý tergeý amaldary aıaqtalǵanǵa deıin jalǵaspaq. Oqýshy búgin sabaqqa qatysqan.

- Oqıǵa saldarynan eki bala jeńil jaraqat aldy. Polıtseıler baltaǵa uqsas zatty taba almady. Osy jaǵdaıǵa baılanysty Bilim berý basqarmasy, Polıtsııa departamenti men oblystyq prokýratýra ókilderimen birlesken tekseris júrgizildi. Birqatar kemshilik anyqtalyp, olardy joıý jumysy júrip jatyr. Osy jaǵdaıǵa qatysy bar oqýshylar esepke alyndy. Balalarmen tárbıe jumysy uıymdastyrylyp jatyr,- dedi basqarma basshysy Marat Ábýov.

Eske salaıyq, 5 aqpan kúni Jylyoı aýdany Qulsary qalasyndaǵy №6 mekteptiń 10 synyp oqýshysy qatarlastarymen bolǵan janjaldan keıin olardy baltamen qýalaǵan vıdeosy áleýmettik jelide taraǵan edi.

Keıin mekteptiń dırektory óz aryzy negizinde qyzmetinen bosatyldy.