Atyraýda kásipkerler úshin quqyqtyq algorıtm ázirlenedi

ATYRAÝ. KAZINFORM – Atyraý oblysynda kásipkerler úshin quqyqtyq algorıtm ázirlenedi.

Óńirlik kásipkerler palatasy janyndaǵy kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńes osyndaı sheshim qabyldady. 

Óńirlik kásipkerler palatasyna jeke kásipkerdiń birinen ótinish túsken. Kásipkerdiń aıtýynsha, qoǵam belsendileri onyń býtıgine kelip, ústinen polıtsııaǵa aryz jazǵan.

«Olar satýshydan sanıtarlyq kitapshany kórsetýdi talap etken. Satýshy bas tartty. Óıtkeni, olar ýákiletti organnyń ókili emes. Soǵan qaramastan, satýshydan ónimniń jaramdylyq merzimin, ondaǵy tańbalaýdyń bar-joǵyn surap, vıdeo túsirdi. Sodan soń polıtsııaǵa aryz jazdy. Keıin SES organynan maǵan 424 myń teńge kóleminde aıyppul salý týraly habar keldi. SES organdary tekserý júrgizbedi. Biraq, joǵaryda atalǵan adamdar toby usynǵan vıdeo negizinde hattama berdi. Mundaı áreket zańdy ma?», - deıdi kásipker. 

Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń tóraǵasy Álibek Semǵalıevtyń aıtýyna qaraǵanda, bul – ózderin qoǵam belsendisi nemese bloger dep ataıtyn adamdardyń is-áreketi. Bıznes sýbektileriniń quqyqtaryn buzý boıynsha alǵashqy jaıt emes.

«Monıtorıng bar. Mundaı shaǵymdar óte kóp. Qoǵam belsendileri óz betinshe shyǵady. Buzýshylyqtar anyqtalǵan jaǵdaıda «102» qyzmetine qońyraý shalyp, polıtseılerdi shaqyrady. Biz kez-kelgen ótinishke jaýap berýge mindettimiz. Eger bizge qatysy bar buzýshylyqtar men dáleldemeler bolsa, hattama toltyramyz. Al, basqa organdarǵa qatysty bolsa, solarǵa jiberemiz. Kásipkerler kóbinese óz quqyqtaryn bilmeıdi. Blogerler zańsyz tekseredi. Olar tıisti organdarǵa habarlaýǵa tıis. Tekserýdi júrgizý úshin Quqyqtyq statıstıka jáne arnaıy esepke alý jónindegi komıtetinen ruqsat alýy kerek. Kásipkerler quqyǵyn buzý belgileri bolsa, qarsy ótinish jazýǵa quqyly», -dedi jergilikti polıtsııa qyzmeti basqarmasynyń basshysy Erlan Bıgambaev.

Atyraý oblysy boıynsha Qazaqstan kásipkerleriniń quqyqtaryn qorǵaý jónindegi sektor meńgerýshisi, óńirlik kásipkerler palatasy dırektorynyń orynbasary Sársenbaı Joldybaevtyń pikirinshe, bıznestiń is-qımyl algorıtmi ázirlenedi. Bul jumysty Atyraý oblysynyń kásipkerler palatasy júrgizedi.

Eske sala ketelik, Atyraýda balabaqshadan oryn alý kezeginiń biryńǵaı bazasy iske qosylǵanyn habarlaǵan edik.