Atyraýda qamys órtinen aýanyń lastanýyna qatysty tekseris bastaldy

ASTANA. KAZINFORM — Atyraýda qamys órtiniń saldarynan aýa lastanyp, onyń zardabyn turǵyndar kórdi. Bul aqparatty Ekologııa jáne tabıǵı resýrstar mınıstri Erlan Nysanbaev rastady.

— Tekseris júrip jatyr, nátıjesin kútemiz, — dep qysqa qaıyrdy Erlan Nysanbaev Úkimet otyrysynan keıin ótken baspasóz máslıhatynda.

Sondaı-aq mınıstr Atyraý aýasynyń lastanýy qamys órti saldarynan ekenin rastady. 

— Iá, órttiń áserinen jel qalaǵa qaraı soqqan, saldarynan qalaǵa kók tútin kelip, halyqqa keri áserin tıgizdi. Aýylda turǵan bolsańyzdar bilesizder, kóktemde aýylda qamys órteıdi, jumsaq kók shyqsyn dep, ony mal jeıdi, — dep tolyqtyrdy vedomstvo basshysy.

Eske sala ketsek, «Aqjaıyq» tabıǵı rezervatyndaǵy qamys órti 13 maýsymda túski mezgilde tutanǵan. Sodan beri 1515 gektardy jalyn sharpyǵan. 

18 maýsymnan beri «Aqjaıyq» rezervatyndaǵy ahýal baqylaý munaralarynan tikeleı kórsetilip jatyr. 

Sondaı-aq «Aqjaıyq» tabıǵı rezervatyndaǵy órtke adam faktorynyń áseri bolýy múmkin ekenin habarlaǵan edik.

Odan bólek «Aqjaıyq» rezervatyndaǵy órtti sóndirýge taǵy bir tikushaq tartyldy.