Atyraýda jyl basynan beri esirtkige qarsy 82 quqyqbuzýshylyq anyqtaldy

ATYRAÝ. KAZINFORM – Atyraý oblysynda bıyl esirtkige qarsy 82 quqyqbuzýshylyq anyqtalǵan. Bul byltyrǵymen salystyrǵanda 19 derekke kóp. 

Atyraý oblystyq prokýratýrasynyń málimetinshe, Memleket basshysynyń tapsyrmasyna sáıkes esirtki qylmysyna jáne nashaqorlyqqa qarsy kúres sharalary kúsheıtilip otyr. 

«Ótken jyly Atyraýda esirtkimen baılanysty 63 quqyqbuzýshylyq anyqtaldy. Al, bıyl osyndaı 82 derek tirkeldi. Zańsyz aınalymnan 8 keliden astam túrli esirtki zattary tárkilendi. Oblystyq prokýratýranyń úılestirýimen ótkizilgen jedel-izdestirý sharalarynyń nátıjesinde Atyraý qalasynyń aýmaǵynda «Fito» zańsyz zerthanasyn uıymdastyrǵan jergilikti turǵyn anyqtalyp, ustaldy. Odan esirtki zattary bar 68 ósimdik alyndy», - dep habarlady oblystyq prokýratýradan.

Prokýratýra qyzmetkerleri ınternet arqyly esirtki zattarynyń taralýyn anyqtaý maqsatynda áleýmettik jelige kúndelikti monıtorıng júrgizip otyr. Úkimettik emes uıymdarmen birge ótkizilgen aktsııalar men reıdtik is-sharalardyń nátıjesinde ártúrli saıtta esirtki jarnamasy bar 30-dan astam jazba joıylǵan. 

Sondaı-aq jyl basynan beri «Kıber-qadaǵalaý» baǵdarlamasy arqyly zańsyz kontenti bar 60 saıt anyqtalǵan. Atalǵan saıttardy buǵattaý maqsatynda jınaqtalǵan derekter Іshki ister mınıstrligine jiberildi. 

Eske sala ketelik, buǵan deıin Atyraýda 2 esirtki fıtolaboratorııasy men 2 óńiraralyq tasymaldyń joly kesilgenin habarlaǵan edik.