Atyraýda eki jasóspirim qaıyr suraýǵa májbúr bolǵan

ATYRAÝ. KAZINFORM – Atyraý prokýratýrasy kámeletke tolmaǵan eki jasóspirim qaıyr suraǵanyn anyqtady.

Atyraý oblysy prokýratýrasy baspasóz qyzmetiniń málimetinshe, jasóspirmider quqyǵyn qorǵaýǵa baılanysty mobıldi toptar qurylǵan. Onyń quramyna prokýratýra, polıtsııa, qorǵanshylyq jáne qamqorshylyq, áleýmettik qorǵaý, densaýlyq saqtaý, úkimettik emes uıymdar jáne basqa múddeli organdardyń qyzmetkerleri, psıhologtar engen. 

«Atyraý oblysynda «Baqytty jáne qaýipsiz balalyq shaq» jobasy júzege asyrylyp jatyr. Balalardyń quqyqtaryn qorǵaýǵa baǵyttalǵan joba aıasynda qaýip tóngen nemese zorlyq-zombylyqqa ushyraǵan jasóspirimder anyqtalady. Máselen, mobıldi toptar ótken aıda turmystyq qıyn jaǵdaıda qalǵan 50-den astam otbasyna bardy. Kámeletke tolmaǵandar arasynda qaıyr suraýdyń 2 faktisi anyqtaldy. Osyǵan oraı QR Ákimshilik quqyq buzýshylyq týraly kodeksiniń 127-babynyń 3-bóligimen (Kámeletke tolmaǵan adamdy tárbıeleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý) ata-analarǵa ákimshilik hattama jasaqtaldy», -dep habarlady prokýratýranyń baspasóz qyzmeti. 

Al, túngi mezgilde kóshe kezgen jasóspirimderge qatysty 23 derek tirkelgen. Osyǵan baılanysty QR Ákimshilik quqyq buzýshylyq týraly kodeksiniń 442-babymen (Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy) ákimshilik hattama toltyrylǵan. 

«Atyraý qalasyndaǵy 67 mektep pen 13 kolledjde smartfon kamerasyn QR-kodqa baǵyttaý arqyly prokýratýra saıtyna onlaın-habarlama jiberýge bolady. Onyń kómegimen oqýshylar men ata-analar kámeletke tolmaǵandardyń quqyqtaryn buzý deregin, problemalar týraly ashyq habarlaı alady», - dep málim etti prokýratýranyń baspasóz qyzmetinen. 

Eske sala ketelik, buǵan deıin Atyraý jasóspirimderi arasynda quqyq buzýshylyq pen sýıtsıd deregi óskenin jazǵan edik.