Atyraýda eki aýdannyń oqýshylary emtıhandy tapsyrmaıdy

ATYRAÝ. KAZINFORM – Atyraý oblysynda eki aýdannyń oqýshylary aralyq jáne qorytyndy emtıhandy tapsyrmaıdy.

Atyraý oblystyq bilim basqarmasy mektepke deıingi jáne orta bilim berý bóliminiń bas mamany Dına Stamǵalıdyń aıtýynsha, Oqý-aǵartý mınıstrliginiń sheshimime sáıkes Mahambet aýdanynda barlyq mekteptiń, Jylyoı aýdanyndaǵy 4 bilim ordasynyń oqýshylary emtıhannan bosatylǵan.

«Atyraý oblysynda 6376 oqýshy aralyq jáne qorytyndy atestattaý emtıhanyn tapsyrmaıtyn boldy. Onyń ishinde Mahambet aýdanyndaǵy 16 mekteptiń, Jylyoı aýdanynda tasqynnan zardap shekken №5, 6, 8 jáne 19 bilim ordasynyń 5-11-synyp oqýshylary bar. Oqýshylardyń qorytyndy baǵasy jyldyq baǵalary negizinde shyǵarylady. Alaıda, 11-synyp oqýshylary UBT tapsyrady. Al, 9-synyp bitirgennen keıin oqýyn kolledjde jalǵastyrýǵa nıetti oqýshylar qabyldaý emtıhanyn tapsyrýy kerek», - dedi Dına Stamǵalı.

Bilim basqarmasy baspasóz qyzmetiniń málimetinshe, bıylǵy oqý jylyn 204 mekteptiń 148 683 oqýshysy aıaqtap otyr. Onyń ishinde 9-synyptyń 12 700 oqýshysy bar. Al, 11-synypty 6 myńǵa jýyq túlek bitiredi.

Eske sala ketelik, buǵan deıin Atyraý oblysynda 149 myń oqýshy jıyntyq baǵalaýdan bosatylǵanyn jazǵan edik.