Atyraýda dabyl sırenasy qosylady degen jalǵan aqparat tarady

ATYRAÝ. KAZINFORM – Atyraýda dabyl sırenasy qosylady degen jalǵan aqparat tarady.Atyraý oblysy TJD qoǵammen baılanys toby áleýmettik jeli men WhatsApp messendjerinde taraǵan aqparatty joqqa shyǵardy.

«Atyraý oblysynda tótenshe jaǵdaı kezinde azamattyq qorǵaýdyń qulaqtandyrý júıesin tekserý júzege asyrylmaıdy. «Barshanyń nazaryna» dybystyq sıgnaly – tótenshe jaǵdaı qaýpi tóngen jaǵdaıda shuǵyl habarlamalardy taratýdyń aldynda halyqtyń nazaryn aýdarý úshin beriletin eskertý sıgnaly. Belgi berilgen jaǵdaıda turǵyndar aǵymdaǵy jaǵdaıdaǵy is-qımyldar týraly nusqaýlar alý úshin aqparat alýdyń qoljetimdi quraldaryn dereý qosýy kerek. Bul – telearna, radıo, ınternet saıttary, áleýmettik jeli men mobıldi qurylǵylarǵa arnalǵan qosymshalar», -dep habarlady departamenttiń qoǵammen baılanys toby. 

Oblystyq jedel shtabtyń málimetinshe, 9 sáýirde Irıkla sý qoımasynan jiberilgen sý kólemi sekýndyna 1670 tekshe metrdi quraǵan. 

Al, «Kazgıdromet» RMK óńirlikk fılıalynyń deregine qaraǵanda, 9 sáýirde tańǵy saǵat 8.00-de Atyraýda sý deńgeıi 30 sm-ge kóterilgen. Sý tasqyny bastalǵannan beri Jaıyq ózeniniń kóterilý deńgeıi 58 sm-ge jetken. 

Eske sala ketelik, budan buryn Atyraý oblysynda tótenshe jaǵdaı jarııalandy.

Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.

Keıin Jaıyq ózeniniń sýy Atyraý qalasyna qaı tustan kirýi múmkin ekenin habarlaǵan bolatynbyz.

Sondaı-aq, Atyraý turǵyndary tasqyn sýǵa qarsy bóget turǵyzýǵa judyryqtaı jumyldy.