Atyraýda bombapanadan vıdeo jarııalandy
ATYRAÝ. KAZINFORM — Atyraý oblystyq TJD qaladaǵy bir bombapananyń jumysy men qyzmetin baıandaıtyn beınerolık daıyndady. Ondaǵy aqparatqa súıensek, bul qorǵanys quralynda 5 negizgi kireberis bar. Azyq túlik pen qosymsha zattardy jetkizýge arnalǵan lıft, tirkeý beketteri qarastyrylǵan.
Bombapanalaǵyshtyń ishinde súzgi jeńildetý júıesi júrgizilgen. Ol birneshe rejımde jumys isteıdi:
- artyq aýa qysymyn jasaý arqyly jeldetý rejımine syrtqa aýany kómirtek totyǵynan tazartaý;
- syrttaǵy aýany ýlaǵysh áskerı zattardan jáne radıoaktıvti shańdardan tazartý;
Qorǵanys qurylysy ortalyq jylý júıesine qosylǵan. Panalaǵyshtyń ishinde aýa temperatýrasy kóterilgen jaǵdaıda úsh salqyndatqysh jumys isteıdi. Bul protses basqarý paneli arqyly iske asady.
Qorǵanys qurylysynyń artyqshylyǵy — aýa klapandaryn qolmen aýystyrý qajettiliginiń bolmaýy. Jeldetý rejımi tańdalǵan kezde klapandar avtomatty túrde aýysyp, ashylyp-jabylady.
Nysan tok kózimen qamtamasyz etilgen. Azyq-túlikke arnalǵan bólme, sý saqtaıtyn rezerýarlar bar.
Atalǵan qosalqy basqarý pýnkti 2015 jyly salynǵanyn aıta keteıik.
Atyraý oblystyq TJD óńirde qansha bombapananyń baryn jáne olardyń jaı-kúıi týraly málimet bermedi.
— Qorǵanysh qurylystary adamdardy tótenshe jaǵdaılar kezinde — avarııalar, órtter, tehnogendik apattar, sondaı-aq áskerı qater tóngen jaǵdaıda — panalatyp, olardyń ómiri men densaýlyǵyn saqtaý úshin qajet. Olar qaýipti faktorlardyń áserin azaıtyp, kómek kórsetý men odan arǵy sharalardy qabyldaýǵa ýaqyt beredi. Qorǵanysh qurylystary olar ornalasqan ǵımarattar men uıymdardyń menshik ıeleriniń qarajaty esebinen ustalady. Eger qorǵanysh qurylysy memlekettik nemese kommýnaldyq menshikke jatsa, ony ustaýǵa arnalǵan shyǵyndardy tıisti jergilikti atqarýshy organ bıýdjet qarajaty esebinen júzege asyrady, — dep málimdedi oblystyq TJD.
Qorǵanysh qurylystary tek tótenshe jaǵdaı týyndaǵan nemese onyń qaýpi bolǵan kezde, sondaı-aq azamattyq qorǵaý boıynsha oqý-jattyǵýlar men jattyǵýlar barysynda paıdalanylady.
— Qorǵanysh qurylystarynyń jaı-kúıine, daıyndyq deńgeıine jáne olardy paıdalanýǵa baqylaýdy ıeleri júzege asyrady. Al Tótenshe jaǵdaılar departamenti óz kezeginde memlekettik baqylaý júrgizedi, tekserýler uıymdastyrady, ádistemelik súıemeldeý kórsetedi jáne anyqtalǵan buzýshylyqtar boıynsha nusqamalar beredi, — dep habarlady oblystyq TJD.
Aıta keteıik, osyndaı bombapanalaǵyshtar týraly kóp aqparat qupııa saqtalady.
Biz osyǵan deıin jekeniń qolyndaǵy bombapanalardyń jaı-kúıi qalaı ekeni týraly jazdyq.