Atyraýda bilim bólimi balalarǵa arnalǵan 600 syılyqty qabyldamady
ATYRAÝ. KAZINFORM – Áleýmettik jelilerde taraǵan vıdeoda almatylyq kásipker Atyraý qalalyq bilim bólimi uıymdastyrǵan memlekettik satyp alý konkýrsynda jeńiske jetkenimen, jetkizilgen 600 jańa jyldyq syılyqtyń qabyldanbaýyna baılanysty 2 mln 700 myń teńgege shyǵynǵa batqanyn málimdedi. Al bilim berý basqarmasyndaǵylar taýar tehnıkalyq talaptarǵa saı kelmegenin aıtty.
Kásipkerdiń aıtýynsha, ol jańa jyldyq syılyqtardy jetkizý boıynsha memlekettik tenderge qatysyp, bir syılyqtyń baǵasyn 4 990 teńge dep usynyp, ózge qatysýshylardan 10 teńgege arzan baǵa kórsetken. Nátıjesinde konkýrs jeńimpazy bolyp Almaty qalasynda tirkelgen Tulpar Service kompanııasy tanylǵan.
Alaıda kásipker Atyraýǵa taýardy tapsyrý úshin kelgen kezde, bilim bólimi syılyqtardy qabyldaýdan bas tartqanyn aıtady.
Jalpy jetkizilgen ónim kólemi – 600 dana balalarǵa arnalǵan jańa jyldyq syılyq. Onyń sózinshe, tek qarjylyq shyǵynǵa ushyrap qana qoımaı, ózin memlekettik satyp alýlarǵa qatysý quqyǵynan aıyratyn josyqsyz jetkizýshiler tizilimine engizý týraly habar alǵan.
Áleýmettik jelide taraǵan vıdeoda kásipker kórý qabileti boıynsha múgedektigi bar ekenin, turaqty jumysqa ornalasý qıyndyǵyna baılanysty kásipkerlikpen aınalysyp júrgenin de jetkizdi. Ol tenderge deıin jáne jetkizý barysynda qalalyq bilim bóliminiń qyzmetkerlerimen hat almasqanyn, suratylǵan qujattardyń barlyǵyn usynǵanyn jáne taýar qabyldanady dep sengenin aıtady.
Atyraý oblystyq bilim berý basqarmasynyń bergen resmı málimedemesine súıensek, syılyqtardy qabyldaýdan bas tartý - taýardyń tenderlik qujattamada kórsetilgen tehnıkalyq erekshelikke sáıkes kelmeýine baılanysty qabyldanǵan zańdy sheshim.
– Konkýrs sharttarynda jańa jyldyq syılyqtyń quramy naqty kórsetilgen. Árbir jıyntyqta 17 túrli tátti, olardyń salmaǵy men quramy talapqa saı bolýy tıis edi. Al jetkizilgen syılyqtardyń ishinde shamamen 10 ǵana tátti bolǵan jáne jalpy salmaǵy belgilengen normadan tómen boldy, – dep habarlady bilim berý basqarmasy.
Bilim bólimi usynǵan málimetke sáıkes, bir jańa jyldyq syılyqtyń bastapqy satyp alý baǵasy qosylǵan qun salyǵynsyz 10 714,28 teńgeni quraǵan. Atalǵan tenderge barlyǵy 17 áleýetti jetkizýshi qatysqan.
Sondaı-aq, bul konkýrs qosymsha satyp alý ekenin atap ótti. Buǵan deıin negizgi satyp alý boıynsha jeńimpaz anyqtalyp, áleýmettik osal sanattaǵy balalarǵa arnalǵan 1 162 jańa jyldyq syılyq tolyq kólemde jáne talapqa saı jetkizilgen. Al qosymsha 600 syılyq balalardy qamtý aıasyn keńeıtý maqsatynda satyp alynǵan.
– Kásipker biz qoıǵan talaptarǵa sáıke kelmegen taýardy 30 jeltoqsan kúni ákeldi. Kelisimshart talaptary oryndalmaǵandyqtan, qarajat jergilikti bıýdjetke qaıtaryldy, – dep málimdedi bilim berý basqarmasy.
Eske salaıyq, memlekettik satyp alý boıynsha jańa erejesi engizilgeni týraly jazdyq.
@almat.tender @ATYRAÝ QALASYNYŃ ÁKІMDІGІ @Tokaev online ♬ الصوت الأصلي - ناصر_naser