Atyraýda byltyr týberkýlezge shaldyqqan 764 adamǵa áleýmettik kómek berilgen

ATYRAÝ. KAZINFORM – Sońǵy 10 jylda Atyraý oblysynda týberkýlezge shaldyqqandar 1,7 esege azaıǵan. Ólim-jitim kórsetkishi 2,6 esege tómendegen.

Atyraý oblystyq fızıopýlmonologııa ortalyǵynyń dırektory Baıtolla Ǵazızovtiń aıtýynsha, ótken jyly 315 adam týberkýlez juqtyrǵany anyqtalǵan. 

– Byltyr týberkýlezge shaldyqqan naýqastar sany 2023 jylǵy kórsetkishten 2,4 paıyzǵa tómendedi. Buǵan týberkýlezdi erte anyqtaý maqsatynda halyqaralyq standarttarǵa sáıkes zamanaýı dıagnostıkalyq ádisterdiń qoldanylýy oń áserin tıgizdi. Qazir óńirdegi týberkýlezge qarsy kúres júrgizetin mekemeler «Gene-Xpert, BACTEC MGIT-960, XDR, Bioneer» syndy ınnovatsııalyq tehnologııalarmen jabdyqtaldy. Soǵan sáıkes juqpaly dertke shaldyqqanymen aınalasyna qaýip tóndirmeıtin naýqastar turǵylyqty jerindegi emhanalarda ambýlatorııalyq em qabyldady. Ótken jyly sondaı naýqastardyń úlesi 17,7 paıyzǵa artty. Al dári-dármekke sezimtal naýqastardyń emdelý kórsetkishi 93,1 paıyzdy qurady. Dárilik preparattarǵa aǵzasy tózimdi naýqastardyń emdelý deńgeıi – 85,6 paıyz, - dep habarlady Baıtolla Ǵazızov. 

Ortalyq dırektorynyń deregine qaraǵanda, 2015 jyldan beri ambýlatorııalyq em qabyldaıtyn naýqastarǵa jergilikti máslıhat sheshimimen aı saıyn 10 AEK kóleminde áleýmettik kómek tólenedi. Máselen, 2024 jyly mundaı kómek 764 adamǵa berilgen. 

Eske sala ketelik, budan buryn Atyraý oblysynda kámeletke tolmaǵan 102 bala qaterli isikke shaldyqqanyn habarlaǵan edik.