Atyraýda byltyr 1137 adam sottalǵan
ATYRAÝ. KAZINFORM – 2025 jyly Atyraý oblysynyń sottarynda 1 650 tulǵaǵa qatysty 1 267 qylmystyq is qaraldy. Onyń ishinde 1 154 adamǵa qatysty 895 is úkim shyǵarýmen aıaqtalyp, 1 137 adam sottaldy, 17 azamat aqtalǵan.
Medıatordyń qatysýymen 9 qylmystyq is qaralǵan. Ótken jyly aıaqtalǵan qylmystyq jáne ákimshilik quqyq buzýshylyq týraly ister sany artqan. Degenmen bas bostandyǵynan aıyrylǵandar men kúzetpen ustaýdy sanktsııalaý sanyn azaıǵan.
Atyraý oblystyq sotynyń baspasóz qyzmeti taratqan aqparatqa súıensek,
2025 jyly oblys sottarymen 21 886 ákimshilik quqyq buzýshylyq týraly is qaraldy. Onyń 563-i apellıatsııalyq satyda qarastyrylǵan. Medıatsııany qoldaný arqyly 1 842 is aıaqtaldy.
Azamattyq alqa tóraǵasynyń mindetin atqarýshy Saǵat Hasan byltyr 2024 jyldyń esepti kezeńimen salystyrǵanda oblys sottaryna kelip túsken talap qoıýlar sanynyń 5 716-ǵa, tatýlastyrý rásimderin qoldanýmen aıaqtalǵan ister sanynyń 776-ǵa artqanyn atap ótti.
«Oblys sottarymen 21 189 azamattyq is qaralyp, onyń ishinde 12 364 is boıynsha sheshim shyǵarylǵan. Tatýlastyrý rásimderimen aıaqtalǵan azamattyq isterdiń sany 3 093 isti qurady.
Azamattyq ister boıynsha oblys sottarymen 78 jeke uıǵarym shyǵaryldy.
Apellıatsııalyq tártipte 1 142 is qaraldy», - dep habarlady Atyraý oblystyq soty.
Ákimshilik ister jónindegi sot alqasynyń tóraǵasy Anargúl Salıhovanyń aıtýynsha, esepti kezeńde 1 203 ákimshilik is qaralǵan. Onyń 390-y sheshim shyǵarýmen aıaqtalyp, 230 talap aryz nemese 58,9 paıyzy qanaǵattandyrylǵan. Tatýlastyrý rásimimen 141 ákimshilik is aıaqtalǵan.
Tatýlastyrý rásimimen 141 ákimshilik is qaralǵan. Ákimshilik isterdi qaraý nátıjesi boıynsha 32 aqshalaı óndirý týraly sheshim bolyp, 28 jekeshe uıǵarym shyǵaryldy.
Apellıatsııalyq alqa 192 ákimishilik is qaraǵan.
Ótken jyly Atyraý oblysynda kópti alańdatqan qylmystyq isterge núkte qoıylǵanyn eske salaıyq.
Jylyoı aýdanynda jeti jastaǵy qyzdy zorlap, óltirgen qylmysker ómir boıyna bas bostandyǵynan aıyryldy.
23 jastaǵy ıAna Legkodımovany óltirgen eki aıyptalýshy da ómir boıyna sottaldy.