Atyraýda bekire ýyldyryǵyn zańsyz tasymaldaǵan turǵyn ustaldy

ATYRAÝ. KAZINFORM – Atyraýda 34 jastaǵy áıelden bekireniń 2 keliden astam qara ýyldyryǵy tabyldy. 

Atyraý oblystyq polıtsııa departamentiniń baspasóz qyzmetinen málim etkendeı, baǵaly balyq túrleri men qara ýyldyryqty zańsyz tasymaldaýǵa tyıym salynǵan.

– Uıymdasqan qylmysqa qarsy kúres basqarmasynyń qyzmetkerleri «Bekire – 2025» profılaktıkalyq is-sharasy kezinde bekire tuqymdas balyqtyń qara ýyldyryǵyn zańsyz tasymaldaǵan áıeldi anyqtady. 1991 jylǵy azamatsha Atyraý qalasyndaǵy qonaqúılerdiń biriniń mańynda ustaldy. Polıtsııa qyzmetkerleri áıeldiń qolyndaǵy qara polıetılen paketten 4 plastıkalyq ydysqa salynǵan bekire tuqymdas balyqtyń qara ýyldyryǵy tabyldy. Qara ýyldyryqtyń salmaǵy – 2 keli 6 gramm, - dep habarlady departamenttiń baspasóz qyzmeti. 

Tárkilengen qara ýyldyryqqa sot-bıologııalyq jáne taýartaný saraptamalary taǵaıyndaldy.

– Atalǵan derekke qatysty QR Qylmystyq kodeksiniń 339-babynyń 1-bóligimen sotqa deıingi tergeý amaldary bastaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy. QR Konstıtýtsııasynyń 77-baby 3-tarmaǵynyń 1-tarmaqshasy, QR Qylmystyq-protsestik kodeksiniń 19-babynyń 1-bóligine sáıkes adamnyń kináli ekendigi zańdy kúshine engen sot úkimimen tanylǵansha, jasalǵan qylmysqa kináli emes dep esepteledi, - dep málim etti departamenttiń baspasóz qyzmetinen. 

Eske sala ketelik, budan buryn Atyraý oblysynda «Bekire – 2025» aktsııasy bastalǵan 1 sáýirden beri 311 keli bekire tárkilengenin jazǵan edik.