Atyraýda avtobýstaǵy tólem júıesinde taǵy bir básekeles paıda boldy
ATYRAÝ. KAZINFORM — Atyraýdaǵy qoǵamdyq kólikte tólem júıesi Onay baǵdarlamasyna aýysady. Bul jóninde jýyqta qalalyq ákimdik málimdedi.
Birneshe kúnnen beri mektep muǵalimderi oqýshylardyń derekteri men sýretterin jınap álek bolyp jatyr. Tipti olardyń arasynda búginde tólem júıesine jaýapty Smart Qala kompanııasy satylyp jatyr degen aqparat tarady. Bul málimetti kompanııa basshylyǵy joqqa shyǵardy.
Avtobus qosymshasy arqyly tólem júıesin júrgizip otyrǵan bul mekeme ákimdiktiń tólem júıesin Onay baǵdarlamasyna aýystyrýyn túsinbeı dal. Óıtkeni olar 2018 jyly qala ishindegi jolaýshy tasymalyna tólem júıesin engizip, qosymsha jáne karta, keıin QR kod arqyly jolaqysyn tóleýge múmkindik jasaýǵa kirisken. 2019 jyldan bastap kúni búginge deıin ár baǵyttyń jumysyna jaýapty. 2025 jyldyń aqpan aıynda qalalyq ákimdik, jolaýshylar tasymalymen aınalysatyn kompanııa jáne Smart Qala mekemesiniń arasyndaǵy kelisim 2032 jylǵa deıin uzartylyp, úshjaqty shart jasalǵan. Qazirgi ýaqytta bul baǵdarlama el boıynsha 21 qalada jumys isteıdi.
— Búginde muǵalimder men oqýshylar tarapynan kóp shaǵym túsip jatyr. Smart Qala jabylyp jatyr degen aqparat olarǵa jetken. Jáne birneshe vıdeo keldi. Onyń birinde ózin Onay qosymshasynyń ókilimin dep ózin tanystyrǵan Álimjan degen azamat «biz Smart Qala-ny satyp alyp jatyrmyz, ol aldaǵy kúnde bolmaıdy, olardyń qurylǵylaryn jańartamyz» dep aıtqan. Muǵalimderge «eger oqýshylardy tirkemeseńder ústińnen aryzdanamyz» degen syndy habarlamalar kelgen. Muǵalimderge arnaıy logın, parol berip, oqýshylardyń qujatyn tirkeńder dep jatqan kórinedi. Al ustazdar «basqa kompanııanyń jumysyn nege isteýimiz kerek» dep qarsylyq bildirýde, — deıdi SmartQala dırektorynyń orynbasary Lázzat Dosmaǵambetova.
Qazirgi ýaqytta qalalyq ákimdik qoǵamdyq kóliktiń júrý josparyn bermeı otyr jáne ákimdik tarapynan kún saıyn baǵdarlamanyń jumys sapasyna qatysty shaǵym túsedi. Degenmen naqty dálel bolatyn málimet túspegen.
Osyǵan deıin Smart Qala kompanııasy qalanyń ortalyǵyndaǵy memlekettik mekemeniń ǵımaratynyń kabınetterin jalǵa alyp otyrǵan edi. Jýyqta «bul nysanǵa ákimdikke qarasty bólimder keledi» degen jeleýmen bosatýdy suraǵan. Qazir kompanııa jańa oryn izdestirý ústinde.
— Onay bizge básekeles mekeme retinde jumys istemek. Ekinshi mekeme, bizdiń jaǵdaıda Onay áýeli osyndaǵy tasymaldaýshy kompanııamen kelisýi kerek. Al olar birinshi ákimdikpen kelisim jasaǵan. Aldaǵy ýaqytta «ákimdik tasymaldaýshy kompanııalardy qyspaqqa almaı ma?» degen suraq týyndap otyr, — deıdi SmartQala ókili.
Kompanııa bıyl qalalyq ákimdik ruqsat berse, 50 aıaldamaǵa medıabordty tegin qoıýdy josparlap otyr.
Biletinimiz, Atyraý qalasynyń ákimdigi men qoǵamdyq kólikte jolaqy tóleýdiń elektrondy júıesin usynatyn Onay kompanııasy arasynda yntymaqtastyq týraly memorandýmǵa qol qoıylǵan.
Jergilikti atqarýshy organ taratqan aqparatqa súıensek, búginde bul júıe Almaty, Qaraǵandy, Temirtaý, Saran, Balqash jáne Óskemen qalalarynda sátti jumys istep keledi. Kompanııa tarapynan qala ortalyǵynda karta satý pýnktteri men qyzmet kórsetý ortalyǵyn ashý josparlanyp otyr.
«Smart Atyraý» KMM basshysy Sartaı Samattyń aıtýynsha, Onay mobıldi qosymshasy arqyly ata-analar balasynyń mektepke jetken-jetpegenin baqylap otyra alady. Turǵyndar men qala qonaqtary úshin qosymsha ishinde qajetti marshrýttar men júrý baǵyttary kórsetiledi. Sondaı-aq platforma arqyly jolaqyny aldyn ala tóleý múmkindigi bar, bul rette jolaqy baǵasy ózgermeıdi.
Qosymshada avtobýstyń buzylyp qalǵany nemese ýaqytsha toqtap turǵany týraly aqparat kórsetiledi. Mundaı jaǵdaıda sońǵy aıaldamada turǵan basqa avtobýs marshrýt boıynsha qozǵalysty jalǵastyra alady.
— Kózi nashar kóretin jandar úshin qosymshadaǵy qarip ólshemin úlkeıtý fýnktsııasy qarastyrylǵan. Al kózi múlde kórmeıtin azamattar úshin daýystap oqý múmkindigi bar. Sonymen qatar qosymsha arqyly bir avtobýstan ekinshi avtobýsqa deıingi araqashyqtyqty jáne kólik qozǵalysynyń naqty ýaqytyn kórýge bolady, — deıdi «Smart Atyraý» dırektory Sartaı Samat.
Smart Qala kompanııasynyń aqparatyna súıensek, júıeni 280 myńnan astam klıent paıdalanady, al qazir «jańa» dep usynylyp otyrǵan barlyq fýnktsııa Smart Qala-da burynnan bar jáne turaqty jumys istep tur.
Búginde tólem jasaýdyń 13 joly qarastyrylǵan. Onyń arasynda birneshe bank qosymshasy bar. Apple Pay-men de tóleýge bolady deıdi kompanııa ókilderi.
Búginde Atyraý qalasynda qoǵamdyq kólik 18 baǵytta qyzmet kórsetedi. Jalpy alǵanda 7 mekemege tıesili 300 tehnıka 32 marshrýtta qatynaıdy.
— Tarıf ózgermeıdi. Ony Onay ózgerte almaıdy. Bizge búginde Onay qolaıly bolyp tur. Avtobýs A núktesinen B núktesine kele jatyp, buzyp qalǵan jaǵdaıda SmartQala qoǵamdyq kólikterdiń baǵytyn eskerte almaıdy. Al Onay-dyń eskertý múmkindigi bar. Atyraýda jumys isteıin dep otyrǵan kompanııa mektep oqýshylaryna tólem kartasyn tegin shyǵaryp, mektepterge aparyp beretin bolady, — dedi «Smart Atyraý» dırektory Sartaı Samat.
Qazirgi ýaqytta qala turǵyndary áleýmettik jeli arqyly tólem júıesin ózgertpeý kerektigi týraly usynys-pikirlerin aıtýda. Ázirge tólem júıesiniń qashan, qalaı ózgeretini belgisiz.
Búginde Smart Qala kompanııasy osy máselege qatysty ádiletsiz básekelestik týyndap jatqany jóninde Básekelestikti qorǵaý jáne damytý agenttiginiń Atyraý oblysy boıynsha departamentine shaǵymdanbaq.
Qalalyq ákimdik osy aptada Onay kompanııasynyń ókilderiniń qatysýymen jıyn josparlanyp otyrǵanyn aıtty.