Atyraýda aýdan ákiminiń áıeli kúıeýinen zábir kórgenin aıtty

ATYRAÝ. KAZINFORM – Atyraý oblysynda aýdan ákiminiń áıeli turmystyq zorlyq-zombylyqqa ushyraǵanyn jetkizdi.

Áıeldiń aıtýynsha, kúıeýi oǵan birneshe ret qol kótergen. Zábir kórgen áıeldiń vıdeosy áleýmettik jelide tarady.

«Birge turǵan 11 jyldyń ishinde balalarymyzdyń kózinshe urdy. Máselen, 2021 jyly tańǵy saǵat 04:00-te mas kúıde meni balalardyń kózinshe uryp, betime jaraqat saldy. Osydan keıin amalsyz jedel járdem men polıtsııa shaqyrýǵa májbúr boldym. Balalarymyz úshin shaǵymymdy qaıtyp alýymdy surady. Bul jaǵdaı 2023 jylǵy 31 mamyrda taǵy qaıtalandy. Taǵy da balalardyń kózinshe meni teýip, uryp-soqty. Meni múgedek qylamyn dep qorqytty. Omyrtqam synyp, bir aı júre almaı qaldym. Osy ýaqytta óziniń tanystaryn paıdalanyp, balalarymdy tartyp aldy», - dedi zábir kórgen áıel.

Atyraý oblystyq Polıtsııa departamenti baspasóz qyzmetiniń málimetine súıensek, aýdan ákimine qatysty qylmystyq is QR Qylmystyq kodeksiniń 107-babynyń 2-bóligimen tergelgen. Qylmystyq is aqpan aıynda sotqa jiberilgen.

Al Atyraý oblystyq sotynyń baspasóz qyzmeti ázirge pikir bildirgen joq.

Eske sala ketelik, budan buryn Atyraýda balalaryn satqan áıel 8 jylǵa sottalǵanyn jazǵan bolatynbyz.