Atyraýda aýa quramynda kúkirtsýtek shekti mólsherden 36 ese asyp ketken
ATYRAÝ. KAZINFORM — Atyraý qalasynda atmosferalyq aýanyń sapasyna júrgizilgen monıtorıng nátıjesinde birqatar aýmaqta kúkirtsýtek kontsentratsııasynyń shekti ruqsat etilgen mólsherden 36 ese artyp ketkeni belgili boldy.
Naqtyraq aıtqanda, búgin Atyraý qalasyna qarasty Tasqala aýylynda bul kórsetkish 17,5 ese, Tasqala aýylyna irgeles aýmaqta 15,0 ese, al Hımposelok aýdanynda 36,3 ese artyq tirkelgen. Bul týraly Atyraý oblystyq tabıǵı resýrstar jáne tabıǵat paıdalanýdy retteý basqarmasy habarlady.
Kezekshi toptyń kestesine sáıkes jáne qala turǵyndarynyń aýa sapasyna qatysty ótinishterine baılanysty Atyraý oblysy boıynsha «Qazgıdromet» RMK fılıalynyń mamandary atmosferalyq aýanyń sapasyn ólsheý maqsatynda synama alý jumystaryn uıymdastyrǵan.
Monıtorıng tómendegi aýmaqtarda júrgizildi:
- Kenózek aýyldyq okrýgine qarasty Tasqala aýyly;
- Tasqala aýylyna irgeles aýmaq;
- Hımposelok aýdany.
Aıta keteıik, atalǵan eldi mekender Atyraý munaı óńdeý zaýytynyń mańynda ornalasqan.
— Synama alý kezeńinde jeldiń baǵyty soltústik–soltústik-shyǵys, aýa temperatýrasy –9 gradýs, aýanyń salystyrmaly ylǵaldylyǵy 81 paıyzdy quraǵan. Atalǵan aqparat qoldanystaǵy zańnama aıasynda tıisti sharalar qabyldaý úshin barlyq ýákiletti memlekettik organǵa joldanady, — delingen resmı málimdemede.
Búgin Keńózek aýyldyq okrýgine qarasty saıajaı turǵyndary 23 qańtardan bastap aýa quramynda kúkirtsýtektiń shamadan tys bolyp, aýyl azamattary jappaı aýyryp jatqanyn aıtty. Ásirese, túngi ýaqytta ıistiń ótkirligi kúsheıgen. Saldarynan dalaǵa shyǵý muń bolyp qalǵan.
— AMÓZ-den shyqqan ıis bizdi aýrý qylyp otyr. Úlkenderde qan qysymy kóterilse, balalar epılepsııa, súıek aýrýyna shaldyǵyp jatyr. Osy ýaqytqa deıin men Mahambet aýdanynda turdym. Ol kezde balalarym sap-saý boldy. Sońǵy 4-5 kúnnen beri mazamyz ketti. Úıden shyǵa almaı qaldyq, tereze de asha almaımyz. Búgin syrtqa shyqqan boıda kózim jasaýrap, júre almadym. Zaýyt ár aptanyń jumasynan dúısenbi saǵat 07:00–ge deıin aýaǵa shyǵaryndaryndy shamadan tys kóp jiberedi, — dedi saıajaı turǵyny Gúlnár Moldaǵalıeva.
Atyraý munaı óńdeý zaýytynyń baspasóz qyzmeti kásiporynnyń zerthanasy turǵyndar aıtqan aýmaqtan synama alyp, zertteý jumysyna kiriskenin, onyń qorytyndysyn qosymsha habarlaıtynyn málimdedi.
Aıta keteıik, qazir Atyraý qalasyndaǵy aýa sapasyn baqylaý boıynsha jumys toby qyzmet etedi. Olar kún saıyn kezekshilik boıynsha taldaý júrgizedi. Jumys tobynyń quramynda oblystyq sanıtarııalyq-epıdemıologııalyq baqylaý departamenti, Atyraý oblysy boıynsha «Qazgıdromet» RMK fılıalynyń jáne ekologııa departamentiniń mamandary bar.
Osyǵan deıin bıyl Atyraýda ekologııanyń turǵyndarǵa áserin ǵylymı zertteý bastalatyny jóninde jazǵan edik.