Atyraýda asfaltbeton shyǵaratyn 7 zaýyt talapqa saı kelmegen
ATYRAÝ. KAZINFORM — Bıyl Atyraý oblysynda 150-ge jýyq joldyń sapasyna baqylaý júrgizildi. Bul týraly «Jol aktıvteri sapasynyń ulttyq ortalyǵy» RMK AOF dırektory Aslan Dıýsenov málimdedi.
Spıkerdiń aıtýynsha, óńirde jalpy uzyndyǵy 3 myń shaqyrymǵa jýyqtaıtyn avtomobıl joly bar. Bıyl sapa saraptamasymen barlyǵy 148 jol-qurylys nysany qamtyldy. Onyń ishinde 25 respýblıkalyq, 11 oblystyq, 79 aýdandyq jáne 33 qalalyq mańyzy bar nysan tekserilgen.
— Jyl basynan beri bizdiń mamandar 600 márte jolǵa shyǵyp, jol qurylysyna paıdalanylǵan materıaldardan 2 500-den astam synama aldy. Sonymen qatar QR Kólik mınıstrliginiń Avtomobıl joldary komıtetiniń tapsyrmasyna sáıkes oblys aýmaǵyndaǵy asfaltbeton zaýyttaryna jyl saıynǵy tekserý júrgizildi. Nátıjesinde jumys istep turǵan 19 zaýyttyń jeteýinde belgilengen talaptarǵa sáıkes kelmeıtin jaǵdaılar anyqtaldy, — dedi A.Dıýsenov.
Sondaı-aq 2025 jyly jol nysandaryn paıdalanýǵa berý tártibine qatysty ózgerister kúshine engen. Endi avtomobıl joldaryn salý, rekonstrýktsııalaý jáne kúrdeli jóndeý nysandary tek Jol aktıvteri sapasynyń ulttyq ortalyǵy bergen jumystar men materıaldardyń sapasy týraly qorytyndy esep bolǵan jaǵdaıda ǵana qabyldanady.
Fılıaldyń jol zerthanasynyń jumysy týraly onyń meńgerýshisi Dáýren Kenjeshev baıandady.
— Synaq zerthanasynyń negizgi maqsaty — qurylys materıaldarynyń sapasyn, beriktigin jáne normatıvtik talaptarǵa sáıkestigin dáleldi túrde anyqtaý. Zerthanada júrgiziletin synaqtar ónimniń qaýipsizdigi men senimdiligin qamtamasyz etip, jobalardyń sapaly oryndalýyna yqpal etedi. Qazir zerthanalyq jumystardy avtomattandyrý mańyzdy ról atqaryp otyr. Avtomattandyrý ólsheý dáldigin arttyryp, adamı faktorǵa táýeldilikti azaıtady, derekterdi jyldam óńdep, saqtaýǵa múmkindik beredi, — dedi ol.
Eske sala keteıik, buǵan deıin jol qurylysy men jóndeýine qatysty mindetti merzim belgilengeni týraly habarladyq.