Atyraýda alǵash ret 14 jasar qyzǵa bet-jaq transplantatsııasy jasaldy

ATYRAÝ. KAZINFORM – Atyraý oblystyq balalar aýrýhanasynda 14 jasar qyzǵa bet-jaq transplantatsııasy jasaldy. Jergilikti dárigerler jambastan alynǵan súıekti jaq bóligine salǵan.

Oblystyq balalar aýrýhanasynyń hırýrgi Aıanbek Myńbaevtyń aıtýynsha, bul – kúrdeli ári alǵashqy ota.

Jasóspirimniń betinde isik paıda bolǵan. Keıin ol stomatolog pen allergologke júgingen. Arnaıy dıagnostıkalyq tekserý kezinde sol jaq betinen kısta anyqtalyp, oblystyq balalar aýrýhanasyna jiberilgen.

«Aýrýhanada buryn mundaı ota jasalǵan joq edi. Áriptesim – travmatolog Jandos Begmanov ekeýmiz oqýshynyń betine tyrtyq qaldyrmaı, bet-jaq transplantatsııasyn aýyz qýysy arqyly júrgizdik. Bul úshin patsıenttiń jambasynan 3-3,5 sm súıek alynyp, jaq bóligine salyndy. Ota úsh saǵatqa sozyldy. Qazir jasóspirim dárigerlerdiń baqylaýyna alyndy. Onyń jaǵdaıy birqalypty, jaǵdaıy jaqsy. Alańdaıtyn eshteńe joq», -dedi Aıanbek Myńbaev.

Eske sala ketelik, buǵan deıin Atyraý oblysynda jyl basynan beri ómirge kelgen 10,5 myń sábıdiń 482-si shala týǵanyn habarlaǵan bolatynbyz.