Atyraýda «Aqjaıyq» tabıǵı rezervatyndaǵy qamys órti 3 táýlikten soń sóndirildi
ATYRAÝ. KAZINFORM – Búgin Atyraý oblysynda «Aqjaıyq» tabıǵı rezervatyndaǵy qamys órti tolyq sóndirildi. Jalyn sharpyǵan aýmaq – 1050 gektar.
Atyraý oblystyq Tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, qamys órti 31 mamyrda tutanǵan.
– Búgin, 2 maýsymda saǵat 16:15-te Damby aýylynan 20 shaqyrym qashyqtyqta janǵan qamys órti tolyǵymen sóndirildi. Órtti sóndirýge oblystyq tótenshe jaǵdaılar departamentinen 85 qyzmetker, 14 tehnıka, 1 ushqyshsyz basqarylatyn ushý apparaty men «Qazavıaqutqarý» AQ-nyń MI-8 tikushaǵy tartyldy. Al «Aqjaıyq» memlekettik tabıǵı rezervatynyń 25 qyzmetkeri, 11 tehnıka jáne 2 júzý quraly jumyldyryldy. Jalyn sharpyǵan aýmaq shamamen 1050 gektar, - dep habarlady departamenttiń ımıdjdik jumys jáne syrtqy kommýnıkatsııalar toby.
Qamys órtin sóndirýdiń 3 táýlikke sozylaýyna birneshe jaıt sebep bolǵan. Birinshiden, sýly, batpaqty aýmaqtaǵy qamys tutanǵan. Ekinshiden, jeldiń ekpini kedergi keltirgen. Úshinshiden, qamys qalyń ári bıik ósken.
– Osyndaı sebepter órt sóndirýshilerdiń jalynmen 3 táýlik boıy kúresýine sebep boldy. Sýly, batpaqty aýmaqtaǵy órt oshaǵyna tehnıkamen jetý múmkin bolmady. Sol sebepten, jalyndy sóndirýge tikushaq qoldanylyp, keshe áýeden órt oshaǵyna 30 tonna sý shashyldy, - dep málim etti departamenttiń ımıdjdik jumys jáne syrtqy kommýnıkatsııalar tobynan.
Qazir órt oshaǵynda 19 qyzmetker 5 tehnıkamen kezekshilik atqaryp júr. Atalǵan aýmaq táýlik boıy baqylaýǵa alynǵan.
Eske sala ketelik, budan buryn Atyraýdaǵy «Aqjaıyq» rezervatynda qamys órti 10 gektarda byqsyp jatqanyn habarlaǵan bolatynbyz.