Atyraýda «Aqjaıyq» rezervatyndaǵy qamys órti oqshaýlandy

ATYRAÝ. KAZINFORM – Búgin Atyraý qalasynyń Erkinqala aýylynan 15 shaqyrym jerde «Aqjaıyq» memlekettik tabıǵı rezervatynyń aýmaǵynda qamys ósimdikteriniń janýy oqshaýlandy. Bul týraly TJM baspasóz qyzmeti habarlady. 

Órtti sóndirýge «Qazavıaqutqarý» AQ MI-8 sý tógý qurylǵysy bar tikushaq jumyldyrylǵan. Barlyǵy 33 ret, jalpy kólemi 100 tonna sý tógildi.

Qazirgi ýaqytta bir oshaqta aýdany 7 ga bolatyn aýmaqta qamys byqsyp jatyr.

Órtti sóndirýge TJD jáne «Aqjaıyq» MTR kúshteri men quraldary, jalpy sany 80 adam, 23 tehnıka jumyldyryldy. Sóndirý jumystary jalǵasyp jatyr. 

Eske sala ketelik, buǵan deıin Atyraý turǵyndaryna tútin men ystyń ıisine baılanysty kóshege shyqpaý eskertildi.

Keıin Atyraýda «Aqjaıyq» rezervatyndaǵy qamys órtine tikushaqpen 12 tonna sý tógilgenin habarlaǵan bolatynbyz.