Atyraýda 9 jyl buryn ashylǵan toqyma fabrıkasy nege istemeı tur
ATYRAÝ. KAZINFORM — Atyraý oblysynda 2016 jyly jún óńdep, túrli ónim shyǵaratyn toqyma fabrıkasy iske qosylǵan edi. Alaıda qazir onyń jumysy toqtap tur.
«Atyraý» áleýmettik-kásipkerlik korporatsııasy» AQ-nyń aktıvterdi basqarý jáne enshiles táýeldi uıymdar departamentiniń basshysy Rýslan Qabıev usynǵan aqparatqa súıensek, fabrıkanyń qurylysy 2014 jyly bastalǵan. Joba eki kezeńmen iske asqan.
— Qazir «Atyraý» áleýmettik-kásipkerlik korporatsııasyna jún fabrıkasyna ıelik etetin «Caspiy Lana Atyrau» JShS-niń jarǵylyq kapıtalynyń 49 paıyzy tıesili. Bul joba jeńil ónerkásipti damytý úshin qolǵa alyndy. Jobaǵa sáıkes qoı jáne túıe júnin bastapqy óńdep, keıin odan daıyn ónim shyǵarý maqsaty kózdeldi, — deıdi Rýslan Qabıev.
Onyń málimetinshe, jobanyń jalpy quny — 2 432,5 mln teńge. ÁKK tarapynan jobaǵa jarǵylyq kapıtal retinde 76,44 mln, maqsatty zaım túrinde 1 576,1 mln teńge salynǵan.
Al joba bastamashysy bolǵan ınvestor 829,5 mln teńge quıǵan.
— Jobanyń óndiristik qýaty — jylyna túıeniń 100 tonna, qoıdyń 350 tonna júnin óńdeý. Alǵashqy óńdeýden ótkizilgen júnnen 400 myń qýma metr jamylǵy shyǵarý josparlandy. Kásiporynda 2015-2017 jyldary 122 967 keli shıkizattyq jún óńdeldi. Odan 65 289 tonna óńdelgen jún alyndy. Bul — jobadaǵy jyldyq qýattyń 27,4 paıyzy. Shıkizat qamytýly jobalyq qýatynyń 10 paıyzynan aspady. Al 2016-2018 jyldary 31,658 tonna jip ıirildi. Osy jyldary 24 391 qýma metr matadan 18 tonna jipti qoldaný arqyly 4 591 jamylǵy shyǵaryldy, — deıdi korporatsııa ókili.
Alaıda atalǵan kásiporynda 2018 jyly qıyndyq týyndaǵan. Al kovıd ınfektsııasy órshigen 2019-2020 jyldary qojyraı bastady. Qazir fabrıkada óndiris toqtap tur.
— Fabrıkanyń jumysyn toqtatýyna birneshe sebep áser etti. Birinshiden, aınalym qarjysy bolmady. Ekinshiden, isten shyqqan keıbir tehnologııalyq qondyrǵylar men stanokterdi jóndeý máselesi sheshimin tappady. Úshinshiden, jobany iske asyrýǵa baılanysty turaqty ónim shyǵarylmady. Tórtinshiden, shıkizatty daıyndaý, naryqqa marketıngtik taldaý sekildi óndiristik úderis josparlanbady. Besinshiden, daıyn ónimdi ótkizýge baılanysty marketıngtik strategııa bolmady. Altynshydan, marketolog, qondyrǵy jónindegi tehnık, toqyma ónerkásibiniń tehnology sekildi mamandar tapshylyǵy týyndady, -deıdi ol.
Korporatsııa ókiliniń pikirinshe, eń basty túıtkil — Atyraý oblysynyń aýmaǵynda sapaly shıkizattyń tapshylyǵy. Tabylǵan shıkizattyq júnniń sapasy tómen bolǵan.
Atyraý oblysynda edilbaı tuqymdas qoı ósiriledi. Qoıdyń bul tuqymy et baǵytynda bolǵandyqtan júniniń talshyǵy iri bolyp keledi.
Mundaı júndi toqyma salasyna qoldaný múmkin emes. Al jińishke jáne jartylaı jińishke talshyqty jún merınos, tsegaı jáne krosbred tuqymdy qoıdan alynady.
Qoıdyń bul tuqymdary Qazaqstanda, Reseıdiń Qalmaq jáne Daǵystan Respýblıkalarynda bar.
Qazir «Atyraý» áleýmettik-kásipkerlik korporatsııasy jún fabrıkasyn qaıta jandandyrý úshin ınvestor izdep jatyr. Jobaǵa qosymsha qarjy salý kerek.
— Investorlarǵa birneshe talap qoıylady. Birinshiden, toqyma ónerkásibinde tájirıbesi bolýy qajet. Ekinshiden, shyǵarylǵan ónimderden barynsha tabys tabatyndaı tıimdi tehnıkalyq-ekonomıkalyq modeldi engizýi kerek. Úshinshiden, kásiporynnyń óniminiń ózindik qunyn túsirip, yqshamdaý jolymen shyǵyndy azaıtqany jón. Tórtinshiden, oblystyń aýdandarynan jáne Reseıdiń kórshiles óńirlerinen shıkizattyq jún jınaıtyn pýnkter ashýy tıis. Besinshiden, ónim ótkizýge baılanysty marketıngtik baǵdarlama ázirlep, uzaqmerzimdi kelisimshart jasaýy kerek, — deıdi departament dırektory.
Onyń aıtýyna qaraǵanda, jún fabrıkasynda buryn 40 adam jumys istegen. Qazir kásiporynda dırektordan basqa jumys isteıtin bir de bir adam joq.
Eske sala ketelik, budan buryn Atyraý oblysynda agrarlyq salanyń túıtkili týraly jazǵan edik.