Atyraýda 5 jasar balanyń basy oryndyqtyń arqalyǵyna qystyrylyp qalǵan

ATYRAÝ. KAZINFORM – Atyraýda 5 jasar bala basyn oryndyqtyń arqalyǵyna qystyryp alǵan. Oǵan jergilikti qutqarýshylar kómekke keldi.

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, oqıǵa Atyraý qalasynda bolǵan. 

– 2019 jyly týǵan bala oınap júrip, basyn oryndyqtyń arqalyǵyna qystyryp alǵan. Keıin qaıta shyǵara almaǵan. Ata-anasynyń áreketi de nátıje bermegen. Buǵan alańdaǵan ata-ana 112 qyzmetine júginip, qutqarýshylardan kómek surady, -dep habarlady departamenttiń qoǵammen baılanys toby.

Jergilikti qutqarýshylar balanyń qystyrylyp qalǵan basyn bosatý úshin «Holmatro» quralyn qoldanǵan. 

– Tótenshe jaǵdaılar qyzmetkerleri ata-analarǵa balalardy qaraýsyz qaldyrmaý qajettigin eskertedi. Balalar sońy ókinishke uryndyrar oqys oqıǵadan qorǵaǵan jón, -dep málim etti departamenttiń qoǵammen baılanys tobynan.

Eske sala ketelik, budan buryn Atyraýda shaıba taǵyp kórmek bolǵan búldirshin dárigerden bir-aq shyqqany habarlanǵan edi.