Atyraýda 5 myńnan astam jádiger tsıfrlyq formatqa kóshirildi
ATYRAÝ. KAZINFORM – Atyraý oblystyq tarıhı-ólketaný mýzeıinde 5 myńnan astam jádiger tolyqtaı tsıfrlyq formatqa kóshirildi. Joba ótken jyldyń qyrkúıek aıynan bastap júzege asyrylyp keledi jáne mádenı murany saqtaý, júıeleý ári kópshilikke qoljetimdi etýdi maqsat etedi.
Tsıfrlandyrylǵan derekter «E-museum» veb-portaly men AIS «SAQTAU» avtomattandyrylǵan aqparattyq júıesi arqyly Qazaqstan Respýblıkasy mýzeı qorynyń memlekettik katalogyna engizilgen. Mamandardyń aıtýynsha, bul bastama mýzeı qoryndaǵy qundy jádigerlerdi zamanaýı formatta saqtaýǵa jáne ǵylymı aınalymǵa keńinen engizýge múmkindik beredi.Mýzeı qorynyń meńgerýshisi Meńsulý Naýryzbaevanyń aıtýynsha, qazirgi tańda etnografııalyq, arheologııalyq, nýmızmatıkalyq jáne ózge de kollektsııalar joǵary sapaly fotosýretke túsirilip, 3D formatta tsıfrlandyrylýda.
– Árbir eksponattyń ınventarlyq nómiri, ǵylymı sıpattamasy, ólshemderi men saqtalý kúıi tolyq kórsetiledi. Kórermender bul jádigerlerdi mýzeıdiń resmı saıtynan, sondaı-aq zaldarda ornatylǵan sensorlyq ekrandar arqyly tamashalaı alady, – deıdi ol.
Oblystyq tarıhı-ólketaný mýzeıiniń qorynda búginde 65 myńnan astam tarıhı jádiger saqtalǵan. Sonyń ishinde 5100-den astamy tsıfrlyq formatqa kóshirilgen. Aldaǵy ýaqytta aýdan ortalyqtaryndaǵy mýzeıler de kezeń-kezeńimen osy júıege qosylady. Jyl sońyna deıin taǵy 9 mýzeı tsıfrlandyrylyp, elektrondy qor 12 500 jádigermen tolyqpaq.
Mýzeı zaldarynda ornatylǵan gologrammalar arqyly kórermender eksponattardy 360 gradýs formatta jan-jaqty kóre alady. Al «Altyn Orda» zalynda múmkindigi shekteýli jandar úshin arnaıy beıneekskýrsııalar usynylǵan.
Mamandardyń aıtýynsha, tsıfrlandyrý mýzeı qoryn saqtaýdyń tıimdi tetigine aınalyp qana qoımaı, tarıhı-mádenı qundylyqtardy ǵylymı zertteý men kórme jumystaryna keńinen paıdalanýǵa jol ashady.
Aıta keteıik, Oraldaǵy Mánshúk Mámetova mýzeıi jańa jádigerlermen tolyqtyryldy.