Atyraýda 209 mln teńgeniń aýyzsý jobasy iske aspaı tur

ATYRAÝ.KAZINFORM - Atyraý oblysy Qyzylqoǵa aýdanyndaǵy Bylqyldaqty eldi mekeninde aýyz sý jetkizýge arnalǵan joba óz nátıjesin bermedi.

Oblystyq bıýdjetten 209 mln teńge bólinip, 2023 jyly 10 shaqyrym sý qubyry tartylǵanymen, turǵyndar sýdyń aşy bolýyna baılanysty ony paıdalanbaı otyr. 
Aýyl turǵyndarynyń aıtýynsha, qubyr arqyly kelgen sý turmystyq qajettilikke de jaramsyz. Tórt túlik te ishpeıdi.

«Sý ár úıge qosylsa jaqsy bolar edi. Qazir sý kelgenimen, paıdalanyp otyrǵan joqpyz. Sýdy úıimizdiń janyndaǵy qudyqtan alyp otyrmyz», – dedi Bylqyldaqty aýylynyń turǵyny Qýandyq Elemesuly.

Joba aıasynda sý tuşytatyn nysan da salynǵanymen, ol búginde qaraýsyz tur. Turǵyndar eldi meken mańynda tuşy sýy bar bulaq pen jeke qudyqtar bar ekenin aıtady. 

Olardyń pikirinshe, bul sý kózderi kezinde eskerilmegen.

Al jaýapty organdardyń málimetinshe, qurylys jumystaryn júrgizgen merdiger mekeme bankrot dep tanylyp, joba aıaqtalmaı qalǵan. 

Saǵyz aýyldyq okrýginiń ákimi Ashat Arystanovtyń aıtýynsha, bul — buryn bekitilgen joba boıynsha salynǵan júıe. Endi qaraýsyz qalǵan sý tuşytatyn stantsııa men qubyrdy «Saǵyz sý» mekemesine senimgerlik basqarýǵa berip, jumysty keler jyldan bastap jalǵastyrý josparlanyp otyr.

- Bul bizge deıin jasalǵan joba. Qazirgi maqsat – nysandy senimgerlik basqarýǵa berip, jumysty jalǵastyrý. Qubyr tartylǵan, endi sýdy júrgizý máselesin sheshemiz, – dedi Saǵyz aýyldyq okrýginiń ákimi Ashat Arystanov.

Aıta keteıik, Bylqyldaqty aýylynda 60-qa jýyq adam turady. 

Osyǵan deıin Mańǵystaý oblysy ákiminiń Aqtaýda aýyz sý tapshylyǵy qalaı tolyǵymen joıylǵany jóninde jazǵan edik.