Atyraýda 20 jyl buryn kúrdeli jóndeýden ótken mektep endi renovatsııa úshin jabylady

ATYRAÝ. KAZINFORM — Atyraý qalasynda Á. Jangeldın atyndaǵy orta mektep kúrdeli jóndeý úshin jabylady. Bul mekteptiń ǵımaratyna 2004 jyly kúrdeli jóndeý júrgizilgen.

Atyraý oblystyq bilim basqarmasynyń baspasóz qyzmeti usynǵan málimetke qaraǵanda, atalǵan mekteptiń ǵımaraty 620 oqýshyǵa arnalǵan. Ǵımarat 1960 jyly paıdalanýǵa berilgen. 

— 2025 jyldyń naýryz aıynan bastap renovatsııa baǵdarlamasymen kúrdeli jóndeý jáne materıaldyq tehnıkalyq bazany qaıta jańǵyrtý jumystary bastalady. Jobaǵa sáıkes kúrdeli jóndeý jumystary 5-7 aıǵa sozylady. Jóndeý jumystaryn 1 qyrkúıekke deıin aıaqtap, mektepti jańa oqý jylynda qaıtadan ashý josparlandy, - dep habarlady basqarmanyń baspasóz qyzmeti.

Atalǵan mektepte 772 oqýshy oqıdy. Osy kezge deıin bul bilim ordasynda apatty dep tanylǵan M.Lomonosov atyndaǵy orta mekteptiń 500 oqýshysy da dáris alǵan.

— Endi kúrdeli jóndeýge jabylatyn bilim ordasynyń oqýshylary M.Móńkeuly atyndaǵy orta mektepte oqıtyn boldy. Olar úsh aýsymda 40 mınýttan bilim alady. Al M.Lomonosov atyndaǵy orta mekteptiń 500 oqýshysy M.Bekmuhambetov atyndaǵy orta mektepke aýysady. Atalǵan bilim ordalarynda da úsh aýysymda bilim berý josparlanyp otyr. Mektepterdiń úsh aýysymǵa aýysýyna baılanysty sabaq kesteleri jasalyp, pedagogıkalyq keńeste talqylanady. Ata-analarǵa túsindirý jumystary júrgiziletin bolady. Oqýshylardyń qaýipsizdigi nazarda ustalatyn bolady, - dep málim etti basqarmanyń baspasóz qyzmetinen.

Eske sala ketelik, buǵan deıin Atyraýda mekteptiń oqýshylaryn tasymaldaıtyn avtobýs jeke maqsatqa paıdalanylǵanyn habarlaǵan bolatynbyz.