Atyraýda 12 jasar bala kıim tigip, tabys taýyp júr
ATYRAÝ. KAZINFORM — Atyraýda 12 jastaǵy jetkinshek qolyna ıne men jip alyp, kıim tigedi. Qazir ol kóptiń suranysyndaǵy sypyra men aljapqysh tigip, tabys taýyp otyr.
Sultan Isattyń ónerge degen qyzyǵýshylyǵy eń aldymen kıim úlgilerin qaǵaz betine túsirýden bastalǵan. Keıin áleýmettik jeli arqyly qyzyǵýshylyǵy oıanyp, túrli vıdeolardy qarap, qolónerge bet burǵan.
Atyraý qalasy Erkinqala aýylynda turatyn ol búginde túrli jármeńke men is-sharaǵa shaqyrtýdy jıi alady. Anasy Janar Temirǵalıdiń aıtýynsha, tapsyrys túsken boıda lezde ony oryndaýdy, tııanaqtylyqty birinshi orynǵa qoıady. Onyń qyzyǵýshylyǵy bastaýysh synypta bastalǵan. Bir qyzyǵy Sultannyń atasy da ismerlikke jaqyn. Al anasy men ákesi bul saladan alys.
— Besinshi synypta kımeıtin shalbarlardy kesip, qaryndasyna beldemshe, korset tigip berdi. Alǵashynda atasy oǵan kishkentaı tigin mashınasyn alyp berdi. Odan keıin taǵy bireýin aldyq. Sypyra, fartýk, kosmetıka salatyn arnaıy qobdısha tigý týraly usynys tastadym, — deıdi áýesqoı tiginshiniń anasy Janar Temirǵalı.
Sultan 4 aıdan beri tiginshilik ónerdi kásibı turǵydan meńgerý úshin arnaıy kýrsqa qatysyp júr. Ótken jyly oıýmen jumysty, quraq kórpe tigýdi arnaıy jobaǵa qatysyp, meńgerip alǵan.Qazir úıinde arnaıy burysh jasap, 2 tigin mashınasymen jumys isteıdi.
— Uzyndyǵy men eni 80 sm bolatyn sypyrany tigýge 1,5-2 saǵat ýaqyt ketedi.Ol úshin bandýk jáne dak matasyn qoldanamyn. Jalpy ár tigiske muqııat mán berý kerek. Mata men jiptiń sapasy men qalyńdyǵy sáıkes kelmeı qalýy múmkin. Qatty matalarǵa arnalǵan ınemen jeńil matalardy tige almaısyń. Mata tartylyp qalady. Djınsy matamen jumys istemes buryn jýyp alǵan durys.Salqyn sýdy paıdalanǵan jón. Bul matanyń kishireıip qalýynyń aldyn alady, — dedi Sultan Isat.
Búginde Sultan kóılek te, bısermen órnektep jeletke de, shalbar da, quraq kórpe de tigedi. Aýyl halqy qysqartatyn, túzetetin kıimderi bolsa jas tiginshini izdep keledi. Qazir ol áleýmettik jelidegi paraqshasyn damytyp, ónerin kópke tanystyrýda.
Nátıjesinde ózge óńirlerden de tapsyrys túsip jatqan kórinedi. Áýesqoı tiginshi jumys isteıtin matalardy ózi tańdaıdy, tapsyrys berýshilermen de sóılesip, marketıngke asa mán beredi.
— Tutynýshymen sóıleskende kıimniń nemese zattyń baǵasyn aıtpaı, matasy men sapasy týraly aqparat beremin. Sodan keıin ǵana baǵasyn aıtamyn, — dedi jas tiginshi.
Bir qyzyǵy jasóspirim tiginnen bólek karatemen shuǵyldanady, ári túrli tátti pisirgendi jany súıedi. Degenmen ismerlikti birinshi orynǵa qoıady. Óıtkeni, bolashaǵyn osy salamen baılanystyrady.
— Ózimniń sheberhanam bolǵanyn qalaımyn. Sán úıin ashqym keledi. Ári qaraı ózimdi damytyp, túrli úlgidegi kıim tigýdi maqsat etemin. Joǵary kásibı bilim alyp, salanyń úzdigi bolýdy kózdeımin, — dep josparyn bólisti Sultan Isat.
Sultan Isat búginge deıin bilgenin qatarlastaryna úıretip, qolónerdi nasıhattap júr. Sondaı-aq ózi tikken buıymdary men kıimderin satyp, túsken qarajatty qaıyrymdylyqqa jumsaǵan kezderi de bolǵan.
Buǵan deıin kıizden rýh sezingen atyraýlyq jas sheber ulttyq ónerdi dáriptep júrgenin jazǵan edik.
