Atyraýda 1 kún buryn joǵalyp ketken er adamnyń múrdesi Jaıyq ózeninen tabyldy

ATYRAÝ. KAZINFORM – Atyraýda 57 jastaǵy er adam iz-túzsiz joǵalyp ketken edi. Onyń múrdesi 1 kúnnen soń Jaıyq ózeninen shyǵaryldy. 

Keshe áleýmettik jelide er adamnyń joǵalǵany týraly habarlanyp, sýreti júkteldi. Ol úıinen 21 qańtarda tańǵy saǵat 4:00-de shyǵyp ketken. Týystaryna Jaıyq ózeniniń jaǵalaýynda ekenin aıtqan. 

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, habar-osharsyz ketken 1968 jylǵy azamat Jaıyq ózeninen izdestirilgen. 

– Іzdestirý-qutqarý jumystary Jaıyq ózeniniń Atyraý qalasyndaǵy Jumysker eldi mekeni tusynda júrgizildi. Súńgýirler 22 qańtarda saǵat 17:00-den ózenniń túbin súzýdi bastady. Keshe keshki 19:35-te er adamnyń múrdesi sýdan shyǵarylyp, polıtsııa qyzmetkerlerine tapsyryldy, - dep habarlady departamenttiń ımıdjdik jumys jáne syrtqy kommýnıkatsııalar toby. 

Jaıyq ózenine batyp ketken adamdy izdeýge tótenshe jaǵdaılar departamentinen 9 qutqarýshy qatysqan. Sondaı-aq 5 tehnıka, 2 júzý quraly men 1 dron tartylǵan. 

Eske sala ketelik, budan buryn Atyraýda Jaıyq ózeniniń jaǵalaýynda qutqarý stansasy ashylǵanyn habarlaǵan edik.