Atyraý ýnıversıtetiniń stýdentterine Geıdar Alıev atyndaǵy stıpendııa berildi

ATYRAÝ. KAZINFORM – H.Dosmuhamedov atyndaǵy Atyraý ýnıversıtetiniń 5 stýdenti Ázerbaıjan Respýblıkasynyń burynǵy prezıdenti Geıdar Alıev atyndaǵy halyqaralyq stıpendııaǵa ıe boldy.

Stıpendııany stýdentterge Ázerbaıjan Respýblıkasynyń Aqtaý qalasyndaǵy bas konsýly Aıhan Sýleımanly tapsyrdy. 

– Jyl saıyn eki eldiń áriptestik, yntymaqtastyq baılanysy nyǵaıyp keledi. Óıtkeni, baýyrlas elderdiń uqsas qundylyǵy kóp. Halyqtarymyzdyń mádenıeti men rýhanııaty, tarıhy da ortaq, - deıdi Aıhan Sýleımanly. 

Bıyl halyqaralyq stıpendııany ıelengen stýdenttiń biri – Dıana Muqasheva gýmanıtarlyq ǵylymdar jáne óner fakýltetinde oqıdy. 

– Ázerbaıjan halqynyń tulǵasy Geıdar Alıev atyndaǵy shákirtaqyny alǵanyma qýanyshtymyn. Bul – men úshin kútpegen ári erekshe sát, -deıdi ol. 

Sondaı-aq, atalǵan stıpendııa kóptildi bilim berý fakýltetiniń stýdenti Áıgerim Aıbosynova, jaratylystaný fakýltetiniń stýdenti Arsen Qazalıev, ekonomıka jáne quqyq fakýltetiniń stýdenti Aızada Sabıdýllına men ınnovatsııalyq bilim berý fakýltetiniń stýdenti Tomırıs Danııarǵa berildi. 

Ýnıversıtet rektory Salamat Idrısovtiń aıtýynsha, osy kezge deıin oqý ornynyń 60-tan astam stýdenti atalǵan spıdenııany ıelengen. 

– Qazaqstan men Ázerbaıjan – tarıhı tamyry tereńge jaıylǵan dostas elder. Aldaǵy ýaqytta ázirbaıjandyq joǵary oqý oryndarymen stýdent almasyp, oqytýshy-professorlardyń biliktiligin attyrý, qos dıplomdy bilim berý baǵdarlamalaryn engizý syndy mańyzdy jumystardy birlese atqaramyz, -deıdi Salamat Idrısov. 

Eske sala ketelik, buǵan deıin Ázerbaıjanda ótetin III TMD oıyndarynyń boıtumary kórsetilgeni habarlanǵan edi.