Atyraý sharýalaryna mal azyǵy úshin sýbsıdııa nege berilmegen
ATYRAÝ. KAZINFORM — Byltyr Atyraý oblysynyń sharýalaryna qysqy mal azyǵyn daıyndaǵany úshin sýbsıdııa qarjysy berilgen joq.
Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń málimetinshe, mal sharýashylyǵymen aınalysatyn 2 349 qurylym bar.
— Aýyl sharýashylyǵy salasynda sýbsıdııa beriletin basym baǵyttar bar. Qazir iri sabaqty mal azyǵyn daıyndaýǵa jumsalǵan shyǵyn úshin beriletin sýbsıdııa máselesi jergilikti bıýdjettiń múmkindigine baılanysty bolyp otyr. Máselen, 2023 jyly mal azyǵyn daıyndaǵany úshin 768 sharýashylyqqa qarjy berildi. Jalpy 2020-2023 jyldary sharýashylyqtarǵa iri sabaqty mal azyǵy daıyndaýǵa berilgen sýbsıdııanyń kólemi 5,8 mlrd teńge boldy, -deıdi Amangeldi Salamat.
«Qazaqstan fermerleri qaýymdastyǵy» qoǵamdyq birlestigi Atyraý fılıalynyń tóraǵasy Murat Sarmanovtyń aıtýyna qaraǵanda, Aýyl sharýashylyǵy mınıstriniń 2019 jylǵy 15 naýryzdaǵy № 108 buıryǵymen Asyl tuqymdy mal sharýashylyǵyn damytýdy, mal sharýashylyǵy ónimderiniń ónimdiligin jáne sapasyn arttyrýdy sýbsıdııalaý qaǵıdasy bektilgen. Keıin bul qaǵıdaǵa ózgeris engizilgen.
— Soǵan sáıkes tórt túliktiń azyǵyna (iri sabaqty mal azyǵy) jumsalǵan shyǵyndar baǵytyn sýbsıdııalaý talaby ózgerdi. Endi sýbsıdııa gıdrometeorologııalyq qyzmet rastaǵan, óńirde mal azyǵyn daıyndaýǵa teris áser etkende, tótenshe jaǵdaı jarııalanǵan nemese qalyptan tys aýa raıy jaǵdaıynda jergilikti atqarýshy organdardyń sheshimimen aýdarylady delingen. Buǵan qosymsha «bul talap Atyraý, Mańǵystaý jáne Qyzylorda oblystarynyń qurǵaq óńirlerinde ornalasqan sút-taýar fermalarynyń mal basyna qoldanylmaıdy» degen talappen tolyqtyryldy, — deıdi Murat Sarmanov.
Al Atyraý oblysy — elimizdegi jartylaı shóleıtti óńirdiń biri. Munda jańbyr az jaýyp, qýańshylyq jıi bolady.
— Biz bul ózgerispen kelispegen edik. Biraq amal qansha, byltyr sýbsıdııalaý qaǵıdasyna engizilgen ózgeris tórt túlik ósiretin, oǵan iri sabaqty azyq daıyndaıtyn sharýashylyqtardy sýbısdııasyz qaldyrdy. Atyraý oblysynda jaz mezgilindegi aptap ystyqta aýa temperatýrasy +38, +39, keıde +40 gradýsqa deıin kóteriledi. Jańbyr sırek jaýady. Bul shabyndyqtaǵy shóp shyǵymynyń az bolýyna áser etedi. Sondyqtan jyl saıyn jergilikti sharýalar qysqy mal azyǵyn Aqtóbe, Batys Qazaqstan oblystarynyń aýmaǵynan daıyndaýǵa ne sol óńirlerden satyp alýǵa májbúr bolyp otyr. Bul — orasan kóp shyǵyn, — deıdi Murat Sarmanov.
Buryn oblystyq aýyl sharýashylyǵy basqarmasyn basqarǵan Jankeldi Rahmetqalıevtiń pikirinshe, iri sabaqty mal azyǵyn daıyndaýǵa sýbsıdııa berilmese, et-sút ónimderiniń baǵasyna áser etýi múmkin.
— Atyraý oblysyndaǵy shabyndyq jerdiń kólemi 50,5 myń gektar shamasynda. Qysta qardyń az túsýi men jańbyr sırek jaýýynan jaıylym alqaptaryndaǵy shóptiń bıiktigi 2-6 sm aspaıdy. Jaýyn-shashyn ádettegiden mol túskende shóp 10-12 sm-ge deıin kóteriledi. Mundaı jaǵdaıda iri sabaqty mal azyǵyn jetkilikti kólemde daıyndaý múmkin emes. Bolashaqta iri sabaqty mal azyǵyn daıyndaýǵa sýbsıdııa berilmese, tórt túlikten alynatyn et, sút ónimderiniń baǵasynyń ósýine áser etedi, — deıdi Jangeldi Rahmetqalıev.
Oblystyq aýyl sharýashylyǵy jáne jer qatynastary basqarmasynyń basshysy Amangeldi Salamat byltyr iri sabaqty mal azyǵy úshin sharýashylyqtarǵa sýbsıdııa berilmegenin jetkizdi.
— Byltyr kóktemdegi sý tasqynynan biraz sharýashylyq zardap shekti. Bıýdjet esebinen zardap shekken sharýashylyqtarǵa ótemaqy berilip jatyr. Áli de zardaptyń shyǵyny eseptelip, ótemaqy qarjysy áli tolyq berilip bolǵan joq. Bul byltyr iri sabaqty mal azyǵyna jumsalǵan shyǵyn úshin sýbsıdııa qarjysynyń berilmeýine áser etti, -dep málim etti Amangeldi Salamat.
Eske sala ketelik, budan buryn Atyraýda kásipkerler qandaı kedergige jıi kezigetinin jazǵan edik.