Atyraý-Oral trassasynyń Mahambet aýdanyna deıingi bóligi jóndeýge jabylady
ATYRAÝ. KAZINFORM – Atyraý qalasynan Oralǵa qatynaıtyn trassanyń Mahambet aýdanyna deıingi bóligi jóndeý júrgizý úshin ýaqytsha jabylady.
Atyraý oblystyq jolaýshylar kóligi jáne avtomobıl joldary basqarmasynyń málimetinshe, atalǵan jol bóligin 3 shilde kúni saǵat 08:00–den bastap jabý kózdelgen.
«Respýblıkalyq mańyzy bar Atyraý-Oral baǵytyndaǵy tas jolynyń 5-67 shaqyrym aralyǵyndaǵy Mahambet aýdanynyń ortalyǵyna deıingi ýchaskesi ýaqytsha jabylady. Jóndeý jumystaryn 8 shildege deıin tolyq aıaqtaý josparlanyp otyr», -dep habarlady atalǵan basqarmadan.
Osyǵan baılanysty jeńil avtokólikter ıelerine oblystyq mańyzy bar Atyraý-Inder baǵytyndaǵy jol arqyly qatynaý usynyldy. Al, aýyr júk kólikteri úshin Mahambet-H.Erǵalıev-Tańdaı aýyly baǵytyndaǵy jol ashyq.
Eske sala ketelik, buǵan deıin Atyraý-Inder baǵytyndaǵy joldyń tasqyn sý basqan bóligi ýaqytsha ashylǵanyn habarlaǵan edik.
