Atyraý-Oral trassasynan Inderborǵa baratyn 7 shaqyrym joldy sý basty
ATYRAÝ. KAZINFORM – Atyraý-Oral trassasynan Inder aýdanynyń ortalyǵy – Inderbor kentine baratyn 7 shaqyrym joldy sý basty.
Inder aýdanynyń ákimi Daryn Shamuratovtyń aıtýynsha, 8 mamyrdan beri atalǵan jol bóliginiń jıegine topyraq tógilip, bóget turǵyzylǵan.
«Qazir jol eki jaǵynan da jabyldy. Kólik qozǵalysy tolyqtaı toqtady. Jolǵa 5-6 saıdan sý quıylyp jatyr. Osyǵan deıin joldyń jıegine topyraq tógip, bógegen edik. Biraq, topyraqpen sýdy ustap turý óte qıyn», -dep habarlady Daryn Shamuratov.
Onyń aıtýyna qaraǵanda, 1993-1994 jyldary dál osy joldy sý shaıǵan.
«Turǵyndar tarapynan «Jol qashan ashylady?» degen saýal týyndap otyr. Dál qazir joldyń qashan ashylatynyn aıta almaımyz», -dedi Daryn Shamuratov.
Eske sala ketelik, budan buryn sý tasqynyna baılanysty Atyraý-Oral trassasynan Inderborǵa baratyn 7 shaqyrym jol jabylatynyn habarlaǵan edik.
