Atyraý óńirinde jyl basynan beri 8 adam sýǵa batyp ketken
ATYRAÝ. KAZINFORM — Atyraý oblysynda jyl basynan beri 8 adam sýǵa ketip, mert boldy. Onyń úsheýi — bala.
Qaza bolǵandardyń beseýi aptap ystyq bastalǵan maýsym-shilde aılarynda kóz jumǵan.
— Qaýipsizdik talaptaryn saqtamaý saldarynan jaz mezgilinde 5 adam sýǵa batyp qaza boldy. Olardyń qatarynda 3 bala bar. Jaıyq ózeni boıynda turǵyndardyń sýdaǵy qaýipsizdigin qamtamasyz etý maqsatynda kúndelikti reıdtik is-sharalar uıymdastyrý jalǵasa beredi, — dedi Atyraý oblysy TJD tótenshe jaǵdaılardy joıý basqarmasynyń bastyǵy, azamattyq qorǵaý maıory Jantóre Demeshov.
Sondaı-aq, qutqarýshylar bıyl sáýirde 2 eresek adamdy, mamyr aıynda 1 balany sýdan qutqaryp qalǵan.
Óńirde qaıǵyly oqıǵalardyń aldyn alý maqsatynda, qutqarýshylar qaýipti ýchaskelerdi aralap, turǵyndardy mas kúıde sýǵa túspeýge, balalardy qaraýsyz qaldyrmaýǵa, qutqarý jıletterin kııýge, sondaı-aq belgilenbegen jáne qaýipti jerlerde shomylmaýdy eskertedi.
2025 jyldyń maýsym-shilde aılarynda júrgizilgen profılaktıkalyq reıdter barysynda QR Ákimshilik-quqyq buzýshylyq týraly kodeksiniń 412 baby boıynsha 83 adamǵa hattama toltyrylǵan.
Atyraý oblystyq TJD deregi boıynsha 2024 jyly 9 adam qaza tapqan. Olardyń tórteýi bala ekeni aıtyldy. Atyraý oblysy Tótenshe jaǵdaılar departamenti turǵyndardan óz qaýipsizdikterine jaýapkershilikpen qarap, sýdaǵy qaýipsizdik erejelerin qatań saqtaýǵa shaqyrady.
Eske sala keteıik, buǵan deıin batys Qazaqstanda sýǵa batyp ketkender sany 20-ǵa jetkenin jazǵan bolatynbyz.