Atyraý oblysynyń taǵy eki aýylynda medıtsınalyq pýnkt ashyldy
Atyraý oblysynda «Aýyldyq jerdegi medıtsınany jańǵyrtý» ulttyq jobasy aıasynda 18 feldsherlik-akýsherlik pýnkt salý josparlanǵan. Sonyń alǵashqysy Mahambet aýdanynyń Taldykól aýylynda paıdalanýǵa berildi, dep habarlaıdy Kazinform.
Jańa feldsherlik-akýsherlik pýnktte akýsher, feldsher, egý bólmeleri bar. Múmkindigi shekteýli jandar úshin pandýs ornatylyp, jýyný bólmesi ashylǵan. Medıtsınalyq jabdyqtar arasyndaǵy ótkelder men dálizge ergonometrııalyq parametr syzylǵan. Munda bir mezgilde 25 adamdy qabyldaýǵa bolady.
«Atyraý oblysynda Memleket basshysy aýyldardaǵy densaýlyq saqtaý júıesin jańǵyrtý jónindegi bastamasyna sáıkes 18 feldsherlik-akýsherlik pýnkt salý josparlanǵan edi. Bul – atalǵan joba aıasyndaǵy alǵashqy nysan. Jaqynda taǵy osyndaı úsh nysan ashylady», - dedi oblys ákimi Serik Shápkenov.
Ákimniń aıtýyna qaraǵanda, aýyldarǵa jumys isteýge dárigerlerge 5 mln teńge kóleminde bir rettik kótermeaqy berilgen. Endi aldaǵy bul qarjyny 10 mln teńgege deıin kóterý josparlanǵan.
Al, Qyzylqoǵa aýdanyndaǵy Aıdyn eldi mekeninde 25 oryndyq medıtsınalyq pýnkt qoldanysqa berildi. Jańa nysan tirkeý, egý, em qabyldaý, dári-dármekti saqtaý, áıelderdi qabyldaý kabınetterimen qamtylǵan. Medıtsına qyzmetkerleri aýyl turǵyndaryna vaktsına egý, alǵashqy medıtsınalyq kómek túrlerin kórsetýdi bastady.
«Bizge medıtsınalyq kómek alý úshin Qarakól aýylyna qatynaý qıyndyq týdyratyn edi. Ásirese, jasy 60-tan asqan adamdarǵa jol júrý ońaı emes. Endi em-domdy óz aýylymyzdaǵy medıtsınalyq pýnktten alatynymyzǵa qýanyp turmyz», - deıdi eldi meken turǵyny Aıbarshyn Kólbaeva.
Qyzylqoǵa aýdanynyń ákimi Qanat Ázmuhanovtyń málimetine súıensek, turǵyndarǵa 1 aýrýhana, 8 dárigerlik ambýlatorııa, 1 feldsherlik-akýsherlik jáne 6 medıtsınalyq pýnk qyzmet kórsetedi. Aýdannyń densaýlyq saqtaý salasynda 482 adam jumys isteıdi. Onyń ishinde 46 dáriger, 302 orta medıtsına qyzmetkeri bar.
Eske sala ketelik, budan buryn Atyraýdyń Reseımen shekaradaǵy aýdanynda úsh medıtsınalyq pýnkt ashylǵanyn jazǵan edik.
