Atyraý oblysynyń qysqy jylytý maýsymyna daıyndyǵy – 87 paıyz

Atyraý oblysynyń qoǵamdyq keńesinde qysqy jylytý maýsymyna daıyndyq máselesi qaraldy. Qazir óńirdiń jylytý maýsymyna daıyndyǵy 87 paıyz bolyp otyr, dep habarlaıdy QazAqparat tilshisi. 

Oblystyq energetıka jáne turǵyn úı-kommýnaldyq sharýashylyq basqarmasynyń basshysy Aıdýlat Kenjebekovtiń málimetine súıensek, bıyl jylytý maýsymy daıyndyǵyna 5,7 mlrd teńge bólingen.

«Qazir elektr qýaty men jylý óndiretin «Atyraý jylý elektr ortalyǵy» AQ qondyrǵylarynyń tozý deńgeıi – 56 paıyz. Kásiporyndaǵy 14 jylý agregatynyń basym bóligi 1960-70 jyldary iske qosylǵan. Sol sebepten jylytý maýsymyna daıyndyq kezeńinde úsh jylý agregatyna jóndeý júrgizildi. Bul – №5, 8 jáne 12-agregat. Munda aldaǵy qazan aıynda qýattylyǵy 65 MVt №13 týrboagregatty iske qosý josparlanyp otyr», - dep habarlady Aıdýlat Kenjebekov.

Onyń aıtýynsha, oblys boıynsha 416 bilim berý, 144 densaýlyq saqtaý nysanyn jylytý maýsymyna daıyndaý jumysy aıaqtalǵan.

«Qazir jeti bilim berý, alty densaýlyq saqtaý mekemesine josparly jóndeý júrgizý jalǵasyp jatyr. Al turǵyn-úı nysandarynyń daıyndyǵy – 93 paıyz. Atyraý oblysyndaǵy turǵyn úı men nysandardyń 87 paıyzy jylytý maýsymyna tolyq daıyn», - dep málim etti Aıdýlat Kenjebekov.

Eske sala ketelik, buǵan deıin Atyraýdaǵy jylý jelileriniń 68 paıyzy tozǵanyn habarlaǵan bolatynbyz.