Atyraý oblysyndaǵy jotalardan 50 mln jyl burynǵy akýlanyń tisteri tabyldy
ATYRAÝ. KAZINFORM – Atyraý oblysyndaǵy Aqkegershin, Aqtolaǵaı, Qoıqara, Imanqara, Shólqara jotalaryna paleontologııalyq zertteý júrgizildi. Ekspedıtsııa músheleri atalǵan jotalardan 160 mln jyl buryn ómir súrgen teńiz baýyrymen jorǵalaýshylardyń omyrtqalaryn, 50 mln jyl burynǵy akýlanyń tisterin tapty.
Atyraý oblystyq tarıhı-ólketaný mýzeıinen uıymdastyrylǵan paleontologııalyq ekspedıtsııanyń jetekshisi, geografııa ǵylymdarynyń kandıdaty, professor Qajymurat Ahmedenovtiń aıtýynşa, 7-18 tamyz aralyǵynda Jylyoı aýdanyndaǵy Aqkegershin, Aqtolaǵaı, Qoıqara, Imanqara, Shólqara taý jotalarynyń bor massıvterine zertteý júrgizilgen.
«Dalalyq jáne kameralyq paleontologııalyq ádisteri qoldanylǵan zertteý kezinde 511 paleofaýna men paleoflora úlgileri jınaldy. Onyń ishinde omyrtqalyǵa jatatyn 259, omyrtqasyzdar sanatyndaǵy 229, tasqa aınalǵan 18 aǵash úlgisi bar. Ekspedıtsııa kezinde Mezozoı dáýiriniń joǵarǵy bor kezeńindegi biregeı qazba qaldyqtary kezdesti. Osy aýmaqta 160 mıllıon jyl buryn ómir súrgen teńiz baýyrymen jorǵalaýshylardyń omyrtqalary, Paleogen akýlalarynyń tisteri men omyrtqalary, balyqtardyń quıryq qanattary, tasqa aınalǵan aǵashtardyń úlgileri, 50 mıllıon jyl burynǵy iri otodus akýlalarynyń tisteri, sondaı-aq, belemnıtterdiń, qosjarnaqty malıýskalar, teńiz kirpileriniń bólikteri tabyldy», -deıdi Qajymurat Ahmedenov.
Ǵalymnyń deregine súıensek, paleofaýnanyń biregeı orny – Jylyoı aýdanyndaǵy Shólqara taý jotalary. Bul aýmaq aýdan ortalyǵy – Qulsary qalasynan ońtústik-shyǵysqa qaraı 130 shaqyrymda ornalasqan.
«1931 jyly paleontolog A.Rıabınınniń Qoıqara qyratynan erte Bor dáýirindegi dınozavrdyń omyrtqalaryn tapqany qyzyǵýshylyq týdyrdy. Ony Embazavr dep sıpattaǵan ǵoı. Bul «Emba kesirtkesi» degendi bildiredi. Biz Embazavrdy Atyraý oblysynyń paleontologııalyq brendi, álemdik ǵylym úshin biregeı olja dep sanaımyz. Ekspedıtsııa materıaldary óńdelip, onyń nátıjeleri boıynsha ǵylymı tujyrym jasalady. Aldaǵy ýaqytta mıllıondaǵan jyldar buryn Atyraý oblysynda ómir súrgen janýarlardyń túrlerin anyqtaý, odan ári zertteý jumystaryn jalǵastyrý qajet» deıdi Qajymurat Ahmedenov.
Eske sala ketelik, budan buryn ortaǵasyrlyq Saraıshyqtan kóne keseneniń dromosy tabylǵanyn jazǵan edik.
