Atyraý oblysyndaǵy Jylyoı aýdanynda sý qoımasy salynýy múmkin be
ATYRAÝ. KAZINFORM – Byltyrǵy sý tasqynynan keıin Atyraý oblysyndaǵy Jylyoı aýdanynda sý qoımasyn salý máselesi qozǵalyp keledi.
Atyraý oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Nurgúl Qalıevanyń aıtýynsha, «Instıtýt Kazgıprovodhoz» JShS-men kelisim jasalǵan. Sý qoımasyn Jylyoı aýdanynyń ortalyǵy – Qulsary qalasynan 60 shaqyrym qashyqtyqta salý kózdelgen.
Atalǵan qurylymdar sý qoımasynyń tehnıkalyq-ekonomıkalyq negizdemesin alǵash ret talqylady. Oǵan qatysýshylarǵa sý qoımasynyń tehnıkalyq-ekonomıkalyq negizdemesiniń úsh nusqasy usynyldy. Talqylaýdan soń 220 mln tekshe metr sý jınalatyn nusqasy tańdaldy.
– Jylyoı aýdanynyń aýmaǵynda sý qoımasyn salý – keńes odaǵy kezinen beri kóterilgen másele. Endi bul másele qaıta qozǵally. Jobanyń tıimdiligi eskerip, sol boıynsha jumys istelip jatyr. Bul sý qoımasy Qulsary qalasy men eldi mekenderdi, mal jáne egin sharýashylyǵymen aınalysatyn sharýa qojalyqtaryn sýmen qamtıdy. Aldaǵy ýaqytta naqty usynystar boıynsha tehnıkalyq-ekonomıkalyq negizdemege sáıkes jobalyq-smetalyq qujaty jasaqtalady, - deıdi Nurgúl Qalıeva.
Onyń aıtýyna qaraǵanda, sý qoımasy birneshe tıimdiligi bar. Birinshiden, Jylyoı aýdanynyń eldi mekenderin sý tasqynynan qorǵaıdy. Ekinshiden, aýdannyń ekologııalyq ahýalyn jaqsartady. Úshinshiden, ekonomıkalyq turaqtylyqty qamtamasyz etetin mańyzdy ınfraqurylymdyq nysanǵa aınalady.
Degenmen, ázirge sý qoımasynyń qurylysyna qajetti qarjy qaıdan bólinetini naqtylanbady. Jobany iske asyrý merzimi de aıtylǵan joq.
Eske sala ketelik, buǵan deıin Jylyoı aýdanyndaǵy eldi mekenderdi tasqynnan qorǵaý úshin 3 deńgeıli bóget salynǵanyn habarlaǵan edik.