Atyraý oblysyndaǵy Taldykól aýylynyń turǵyndary evakýatsııalandy
ATYRAÝ. KAZINFORM – Atyraý oblysynda QR Tótenshe jaǵdaılar mınıstrliginiń qutqarýshylary Jaıyq ózenindegi sý deńgeıine táýlik boıy monıtorıng júrgizýdi jalǵastyrýda, dep habarlaıdy mınıstrliktiń baspasóz qyzmeti.
Mahambet aýdanynyń Taldykól aýylyna aparatyn avtojol arqyly sý júrýine baılanysty jergilikti turǵyndardy aldyn ala evakýatsııalaý týraly sheshim qabyldandy. 121 adam, onyń ishinde 41 bala júzý quraldarynyń kómegimen aýyldan ketti. 26 aýyl turǵyny Atyraý qalasynyń evakýatsııalyq pýnktterine jetkizilip, ornalastyryldy. 90-nan astam adam týystarynyń úılerine bardy. Taldykól aýylynda turǵyn úıler men áleýmettik nysandardy sý basý faktisi tirkelgen joq.
Aıta keteıik, búgin tańerteń Atyraý oblysyna Tótenshe jaǵdaılar mınıstri Shyńǵys Árinov keldi. Barlyq jumystar onyń jeke baqylaýymen júrgizildi.
Sondaı-aq, qazirgi ýaqytta qutqarýshylar arnaıy tehnıkanyń kómegimen Mahambet aýdanynyń Jalǵansaı aýyly aınalasyndaǵy úıindi qorǵanysh biliginiń janynda tasqyn sýdy sorý jumystaryn júrgizýde. Atyraý qalasyn jaǵalaı qosymsha qapshyqtar tóselýde.
Esterińizge sala keteıik, buǵan deıin óńirge Qyzylorda, Túrkistan, Almaty, Aqtóbe, Mańǵystaý oblystarynan, Shymkent qalasynan qutqarýshylar toptary jáne QR TJM 52 859 áskerı bóliminiń áskerı qyzmetshileri kelgen bolatyn.
«TJM turǵyndardan dúrbeleńge túspeýdi, TJD men jergilikti atqarýshy organdardyń (ákimdikterdiń) usynymdaryna sáıkes áreket etýdi jáne qajet bolǵan jaǵdaıda qaýipsiz oryndarǵa evakýatsııalaýdy suraıdy»,-delingen habarlamada.
