Atyraý oblysynda jyl basynan beri tabıǵatty búldirgenderge 11,4 mlrd teńge aıyppul salyndy
Atyraý oblysynda jyl basynan beri tabıǵatty búldirýshilerge jospardan tys 27 tekserý júrgizilgen. Tekserý qorytyndysymen zań buzýshylarǵa 11 mlrd 48 mln teńge aıyppul salyndy, dep habarlaıdy Kazinform.
Atyraý oblysy boıynsha Ekologııa departamentiniń basshysy Álibek Bekmuhametovtiń málimetinshe, tekserýler nátıjesinde zań buzýshylyqqa qatysty 39 derek anyqtalǵan.
– Ekologııalyq zańnama talaptaryn saqtaý boıynsha jospardan tys 27 tekserý júrgizilip, 39 buzýshylyq anyqtaldy. Tekserý jumystary «Atyraý munaı óńdeý zaýyty», «Karabatan Utility Solutions», «Teńizshevroıl» kompanııalary men «JylyoıSý» MKK-ǵa júrgizildi. Kinálilerge qatysty 96 ákimshilik is qozǵaldy. Atalǵan tekserýler nátıjesine baılanysty jalpy quny 11 mlrd 48 mln teńgeniń aıyppuly salyndy, - dep habarlady Álibek Bekmuhametov.
Onyń aıtýynsha, «Atyraý munaı óńdeý zaýyty» JShS QR Ákimshilik quqyq buzýshylyq týraly kodeksiniń 328-babynyń 3-bóliginde kózdelgen qorshaǵan ortaǵa bekitilgen normatıvter kólemin bir jyl ishinde eki retten kóp asyrǵan.
– «Atyraý munaı óńdeý zaýyty» JShS-ǵa qatysty tehnologııalyq rejımniń buzǵany úshin 4 ret, elektr energııasynyń óshýi boıynsha 1 ret jospardan tys tekserý júrgizildi. Alaý qondyrǵysynda gazdardy jaǵý kezinde normadan artyq emıssııalar júzege asyrylǵan. Ónerkásiptik emıssııalardyń synamalaryn alýǵa arnaıy oryndardyń bolmaǵany, emıssııalardyń avtomattandyrylǵan monıtorıngi júıesi engizilmegeni jáne qaldyqtardy basqarý talaptarynyń buzylǵany anyqtaldy, - dedi Álibek Bekmuhametov.
Al, «Karabatan Utility Solutions» JShS-ǵa jospardan tys 4 tekserý júrgizilgen.
– Tekserýler kezinde qondyrǵyǵa parnıkti gazdarǵa alynǵan kvota normasyn asyrý baıqaldy. Ekologııalyq ruqsatsyz jer relefine sarqyndy sýlardy tógý, jerdi búldirý jáne berilgen nusqamany oryndamaý túrindegi buzýshylyqtar anyqtaldy. Sáıkesinshe anyqtalǵan buzýshylyqtarǵa 7 mlrd 238 mln teńge aıyppul salyndy, - dep málim etti departament basshysy.
Eske sala ketelik, buǵan deıin Atyraý munaı óńdeý zaýytyna 12 mln teńge aıyppul salynǵanyn jazǵan edik.
