Atyraý oblysynda jaz bastalǵaly sýǵa batqan 9 adamnyń tórteýi – bala

ATYRAÝ. KAZINFORM – Atyraý oblysynda jaz maýsymy bastalǵaly 9 adam sýǵa batyp ketken. Onyń ishinde 4 bala bar.

Atyraý oblystyq tótenshe jaǵdaılar departamenti jedel-qutqarý jasaǵynyń basshysy Ádilhan Jumalıevtyń málimetinshe, sońǵy úsh jylda sýǵa batqan 43 adam qaıtys bolǵan. Sý aıdyndarynda jantásilim etkenderdiń 15-i – kámeletke tolmaǵan jasóspirimder. 

«Bıyl jaz mezgili bastalǵaly beri oblystyń sý aıdyndarynda qaýipsizdik is-sharalary kúsheıtildi. Qazir óńirdegi sý aıdyndarynda «Balalardy sýdan qorǵańyzdar» aktsııasy ótip jatyr. Jergilikti qutqarýshylar 8 adamdy, onyń ishinde 4 balany qutqaryp qaldy. Soǵan qaramastan bıyl 9 adam, onyń ishinde 4 bala sýǵa batyp, qaıtys boldy», -deıdi Ádilhan Jumalıev.

Onyń aıtýynsha, oqys oqıǵaǵa sebepker bolatyn birneshe jaıt bar. Birinshiden, buǵan sý turǵyndardyń sý aıdyndaryndaǵy tyıym salynǵan tusta sýǵa túsýi áser etedi. Ekinshiden, ata-analar balalardy jaǵalaýda qaraýsyz qaldyrady. Úshinshiden, qutqarýshylardyń qaýipsizdikti saqtaý týraly eskertýine elemeıdi. Tórtinshiden, óz kúshin asyra baǵalaý da ókinishke uryndyrady. Besinshiden, keıbir turǵyndar júze almasa da sýǵa tusýge áýestigin tejeı almaıdy.

«Ruqsat etilmegen tusta shomylýdyń sońy qaıǵyly jaǵdaıǵa ákelip soqtyrýy múmkin. Sondyqtan, tótenshe jaǵdaılar departamentiniń qutqarýshylary turǵyndardyń qaýipsizdigi men ómirin saqtaý úshin reıdtik is-sharalardy jıi ótkizedi. Atyraý oblysynda tabıǵı sıpatta jarııalanǵan tótenshe jaǵdaıǵa baılanysty sýǵa shomylý maýsymy áli ashylǵan joq. Qazir oblys aýmaǵynda sýǵa túsýge tyıym salynǵan ári qaýipti 70 aýmaq bar. Bul aýmaqtarda 200-den astam eskertý belgisi qoıylǵan. Biraq, turǵyndar bulapqa baǵynbaı júr. Jaqynda Kókarna jáne Besikti eldi mekeniniń tusynda 4 jasósirim sýǵa batyp, qaıtys boldy. Osyǵan baılanysty oblys turǵyndary men qonaqtarynan qaýipsizdik talaptaryn saqtaýdy, belgilenbegen aýmaqta sýǵa túspeýdi eskertemiz», -dep málim etti Ádilhan Jumalıev. 

Qazir 80-ge jýyq qutqarýshy sý aıdyndaryndaǵy qaýipti sanalatyn 24 aýmaqta kezekshilik atqaryp júr. Qutqarýshylar sýǵa shomylý erejesin saqtamaǵan 30-ǵa jýyq turǵyndy jaýapkershilikke tartty.

Eske sala ketelik, budan buryn Atyraýda eki jasóspirim Jaıyq ózenine batyp ketkenin habarlaǵan bolatynbyz.

Jasóspirimniń biriniń múrdesi eki kún eki kúnnen keıin sýdan shyǵaryldy.

Keıin taǵy eki jasóspirim Jaıyq ózenine batyp ketti.