Atyraý oblysynda jasóspirimder arasyndaǵy qylmys kóbeıgen
ATYRAÝ. KAZINFORM – Atyraý oblysynda jasóspirimder men jastar arasyndaǵy qylmys alańdatady. Sońǵy 5 jylda 4 myńnan jas qylmystyq jaýapkershilikke tartylǵan.
Atyraý oblysynyń prokýrory Baýyrjan Jumaqanovtyń aıtýynsha, jasóspirimder arasyndaǵy qylmystyń óskeni alańdatady.
— Elimizde «Zań jáne tártip» ıdeologııasyn ilgeriletý jónindegi 2025-2030 jyldarǵa arnalǵan tujyrymdamasy bar. Tujyrymdamanyń oryndalýy memlekettik organdardyń ózara is-qımylynyń keń formatynda qamtamasyz etildi. Degenmen, sońǵy 5 jyl ishinde jalpy qylmys deńgeıi tómendeýine qaramastan, jasóspirimder men jastar arasyndaǵy qylmystyń ósýi alańdaýshylyq týǵyzyp otyr. Atalǵan kezeńde 4 myńnan astam jas qylmystyq jaýapkershilikke tartyldy. Onyń 386-sy — kámeletke tolmaǵan jasóspirimder. Al, 1 myńnan astam jas aýyr, 151-i asa aýyr qylmys jasaǵany anyqtaldy, — deıdi Baýyrjan Jumaqanov.
Sondaı-aq, nazar aýdaratyn jaıttyń biri — jasóspirimder arasyndaǵy sýıtsıd. Máselen, sońǵy 5 jylda sýıtsıdke qatysty 104 derek tirkelgen. Al, 33 jasóspirim ózine qol salǵan.
— Bizdiń maqsatymyz — óziniń jáne eliniń bolashaǵy úshin jaýapty óskeleń urpaqty tárbıeleý jáne sanaly azamat retinde jetilýin qalyptastyrý. Osy oraıda birde-bir qaıǵyly oqıǵa, birde-bir qylmys memlekettiń nazarynan tys qalmaıdy. Quqyq qorǵaý organdary isti jedel ashýy kerek, — deıdi Baýyrjan Jumaqanov.
Onyń pikirinshe, oıyn-saýyq mekemeleriniń jumys rejımin qaıta qaraý qajet. Alkogol ónimderin satý men tutynýǵa baqylaýdy kúsheıtiledi.
— Internet keńistigindegi destrýktıvti kontentti buǵattaý, alkogolızmmen, nashaqorlyqpen, lýdomanııamen jáne basqa da táýeldilik túrlerimen kúreske qatań baqylaý men tálimgerlik júıesi iske qosylady. Bilim berý mekemelerinde ásirese, bastaýysh synyptardan bastap oqýshylardyń adamgershilik, rýhanı jáne patrıottyq qasıetterin qalyptastyrýǵa baǵyttalǵan arnaıy tárbıe jumystaryn qamtamasyz etýge nazar aýdarylady, — dep málim etti Baýyrjan Jumaqanov.
Eske sala ketelik, budan buryn Atyraý oblysynda moped júrgizýshileri qandaı talaptardy buzyp júrgenin jazǵan edik.
⠀